FESTË TË MADHE KA SOT SHQIPËRIA

“FESTË TË MADHE KA SOT SHQIPËRIA", është një nga vallet më emblematike e ndërtuar mbi motivet e tekstit dhe muzikës së rapsodit DERVISH SHAQA. Koreografi dhe kërcimtari BESIM ZEKTHI me rastin e 50-vjetorit të Festës së Flamurit në vitin 1962 është takuar në Vlorë me rapsodin Dervish Shaqa, i cili kishte përgatitur një këngë kushtuar këtij jubileu. Kënga fillonte me këto vargje: “Festë të madhe ka sot Shqipëria, këngë e valle për jetën e re, brohorasin të gjithë nga zemra, rrofsh sa malet, o jubile”. Kjo këngë pas një viti, u bë himni i valles “Festë të madhe ka sot Shqipëria”. Këtu filloi embrioni i kësaj valleje, nga kënga madhështore e Dervish Shaqës, që u bë simbol i kulturës kombëtare shqiptare në gjithë botën, deri në "Gjerdanin e Artë" në Francë. Teksti i këngës së Dervish Shaqës është zgjeruar duke futur edhe vargje për udhëheqësin e asaj kohe, Enver Hoxha dhe Partinë e Punës së Shqipërisë. Kjo video është realizuar nga Televizioni Shqiptar në vitn 1984.