Dünyanı gözləyən TƏHLÜKƏ: Su böhranı müharibə riskini artırır

Qeyd: Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Yaşıl Dünya” Ekoloji Maarifləndirmə İctimai Birliyi tərəfindən həyata keçirilən "Dayanıqlı inkişaf naminə: effektli su idarəetməsinin təşviqi" layihəsinin icrası davam edir. Layihə çərçivəsində “Pozan” TV internet televiziyasında ətraf mühit üzrə tədqiqatçı Samir Əsədlinin “Su qıtlığı qapıda: ərzaq təhlükəsizliyi necə təmin ediləcək” mövzusunda "Qlobal iqlim fəsadları: quraqlıq və şoranlaşma” adlı video-müsahibə hazırlanıb. Verilişdə qeyd olunub ki, qlobal su çatışmazlığının dərinləşməsi gələcəkdə dövlətlər arasında gərginliyi artıran əsas amillərdən birinə çevrilə bilər. Xüsusilə transsərhəd çaylar və su hövzələri uğrunda rəqabətin güclənməsi regional münaqişə riskini artırır. Həmçinin bildirilib ki, şoranlaşma və quraqlıq kənd təsərrüfatı üçün ən ciddi ekoloji təhdidlərdən hesab olunur. Torpaqların məhsuldarlığının azalması və su ehtiyatlarının tükənməsi ərzaq istehsalına mənfi təsir göstərərək gələcəkdə ərzaq qıtlığı riskini artırır. İqlim dəyişikliklərinin təsiri ilə bu proseslərin daha da sürətlənməsi dünya ölkələri ilə yanaşı, Azərbaycan üçün də aktual çağırışa çevrilib. Su ehtiyatlarının səmərəli idarə olunması, müasir suvarma texnologiyalarının tətbiqi və torpaqların meliorativ vəziyyətinin yaxşılaşdırılması ərzaq təhlükəsizliyinin təmin edilməsində həlledici rol oynayır. Əks halda, kənd təsərrüfatı məhsullarının istehsalında azalma baş verə, nəticədə bazarda qiymətlər yüksələ və əhalinin ərzaq təminatı ilə bağlı problemlər dərinləşə bilər.