TRIKITRAKA TRIKITRON 2007 (5x04) Santurtzi – “KAKU KARABINIERI”

Euskal Telebistak 2007. urtean zehar emititutako Trikitraka Trikitron programaren 5. denboraldiko 4. atala da hau, 2006. urteko azaroan Santurtziko Serantes kultur aretoan grabatua. Atal honetan, Pepitto detektibez jantzita azalduko da geltokian, baina ez du lizentzia eta plaka aurkituko. Bestalde, Txirrik arrautzez beteriko saski bat ekarriko du. Gauza garrantzitsu bat egitera joan eta Mirri eta Txiribiton geldituko dira arrautzen “zaindari”. Bat-batean, trumoi hotsak entzungo dira geltokian. Horrek gauza bakarra esan nahi du: Kakusai Santurtziko geltokira iristear dagoela. Ondoren, Mirri Txiribitonen lepo barre egiteko asmoarekin itzuliko da. Txiribiton etortzen denean, denak eserita egongo dira. Txiribiton esertzen denean, berriz, denok aulkitik altxako dira. Gero, Txiribiton kirola egiteko ideiarekin azalduko da, baina zer kirol egingo du? Bitartean, Marsel magoak makil eta sokekin jokoa egingo du eta Ane Miren kontorsionistak saioa eskainiko du ere . Hori gutxi balitz, Santurtziko haurrek Pelipe trenari jaten emateko aukera izango dute, goxoki-jaurtiketan lehiatuz. Saioaren amaieran, Kaku Karabinieri polizia zorrotzak bere aginduak ezarriko ditu geltokian. Agindu edo arau horiek ez dira pailazoen gogokoak izango. Hortaz, zigorra argia izango da: pailazoak kalabozora. Gainera, Txirri, Mirri eta Txiribitonek abesti hauek abestuko dituzte: "Barre egin", "Behin edo behin", "Uretara!" eta Altza Pelipe!