Xəzər Süleymanlı-Zəng etməyəcəm sənə ( Nüsrət Kəsəmənlinin şeiri)

şeir: Nüsrət Kəsəmənli səs: Xəzər Süleymanlı piano: Vüsal Süleymanov Nüsrət Kəsəmənli/İradəsizlik Zəng etməyəcəm sənə, Əvvəl telefon nömrəsini unudacağam, sonra səni. Barmaqlarımın yaddaşından siləcəyəm saçlarının yumşaqlığını. Gəlməyəcəyəm sizə tərəf; bəhanə edəcəyəm yolların uzaqlığını.. Qovacağam yaddaşımdan xırmandan sərçə qovan kimi sarıdimdik xatirələrini. Qərəzli arzulartək ürəyimdə boş qoyacağam yerini. Zəng etməyəcəm sənə. Əli qoynunda qalacaq lal telefonun, şüşə gözlərindən kədərli rəqəmlər boylanacaq sənə. Kədərlə baxacaqsan sükutun hədəsinə. Hər gecə yuxulu gözlərində birgünlük ümid öləcək; yuxuna qorxulu şübhələr töküləcək, balıncın qarısı üşüyəcək… Zəng etməyəcəm sənə? Boşaldı cibimin 2 qəpiklik yükü. Avtomat telefonların azalacaq bir sakini, Iki yeri boş qalacaq arxa sırasında kinoteatrların, adını tapmayacaqsan arasında yeni yazdığım sətirlərin. …bu günün də sənsiz axşamı gəldi…, evdəsənmi görəsən? Telefonun yanındamı dayanmısan yenə sən? Səsim isidərmi otağınızı? #xezersuleymanli #xəzərsüleymanlı