ვისთვის შენდება ჰესები? - ღია სივრცე [09.05.2026]

დღეს ჩვენ გაჩვენებთ, როგორ იქცა საქართველო პრივილეგირებული ჯგუფების „შპს“-დ, სადაც მთებს, მდინარეებსა და სოფლების მომავალს ერთეულები ფლობენ. დღევანდელ გადაცემაში: რაჭის დანაწილებული მდინარეები - როგორ ჩაიგდეს ხელში რიცეულას ხეობა პარლამენტარებმა და მათმა ბიზნესპარტნიორმა სპორტის ვარსკვლავმა. ხუდონჰესის აჩრდილი კვლავ ცოცხალია - 12 წლის შემდეგ „ქართული ოცნება“ ზემო სვანეთს ისევ დატბორვით ემუქრება. ფიცი არ გატყდება! ისმოდა გასულ კვირას ხაიშში. საპროტესტო აქციაზე გელა მთივლიშვილი იმყოფებოდა. რეპორტაჟი - სვანეთიდან ორასამდე ახალი ჰესი - სწორედ ესაა დაგეგმილი ბოლო წლების სახელმწიფო განკარგულებების მიხედვით. ამ თემაზე დიდი გამოძიება უკვე გამოქვეყნდა „მთის ამბების“ ვებგვერდზე. მასალაში დოკუმენტურად, ოფიციალური ციფრებით დავასაბუთეთ, რომ საქართველოს უცხოეთიდან შემოაქვს 10%-ზე ნაკლები იმ ელექტროენერგიისა, რასაც ქვეყანა წლის განმავლობაში მოიხმარს. თუ დენის მომხმარებელ გიგანტებს, კრიპტოვალუტის მწარმოებელ ფერმებს გამოვრთავთ, იმპორტის წილი კიდევ უფრო შემცირდება. მაინერებისგან ბიუჯეტში გადასახადები არ შედის, ელექტროენერგიაში კი რიგით მოქალაქეებზე მრავალჯერ დაბალი ტარიფი აქვთ. რატომ ვაშენებთ მათთვის ათობით ახალ ჰესს, რომელიც ქვეყანას ბუნების განადგურებად უჯდება და რომელთაგან 31 რაჭის მდინარეებმა უნდა მოამარაგოს. რეპორტაჟი რაჭიდან სტუდიაში სტუმრები არიან: დათო ჭიპაშვილი, „მწვანე ალტერნატივას“ წარმომადგენელი გიორგი მარგებაძე - მცირე და საშუალო ჰესების ასოციაციის ხელმძღვანელი.