"Həm insanlar işlərini itirirlər, həm də onların tibbi xidmətlərə çıxışına əl qoyulur"

Neftçalanın Xolqaraqaşlı Kənd Sahə Xəstəxanasında çalışan 54 əməkdaşdan 34-nün “islahat” adı altında işdən çıxarıldığı bildirilir. Məlumata görə, işdən azad edilənlərin 20-si kiçik tibb işçisidir. İşçilərin sözlərinə görə isə qəfildən xəbər edilən bu qərarın səbəbləri onlara izah edilməyib, yalnız yeni iş tapmaları üçün iki aylıq möhlət verilib. “Onlar üçün bu, çox gözlənilməz olub. Xəbərin doğru və ya yanlış olduğunu öyrənmək üçün xəstəxanaya yığılmışdılar, hansısa rəsmi qurumdan nəsə gözləyirdilər. Amma əlbəttə ki, gələn olmadı”, - ictimai fəal Vəfa Nağı deyir.