Tortë dhe çelësat e shtëpisë së re! Dy gëzime në një ditë, Rama te familja Allaraj në Farkë

TIRANE-Rindërtohet shtëpia e parë pas shembjeve nga tërmeti tragjik i 9 muajve më parë, 26 nëntorit të vitit të kaluar. Kryeministri Edi Rama, i shoqëruar nga kryebashkiaku Veliaj dhe ministri i Rindërtimit Ahmetaj ishin në Farkë ku i dorëzuan çelësat e shtëpisë së re familjes Allaraj, që kishte dy gëzime në një ditë, pasi vajza e madhe mbushi 13-vjeç. Pasi panë shtëpinë e re, Rama, Veliaj dhe Ahmetaj me distancë për shkak të masave anti-COVID uruan familjen në oborr, ku nuk munguan batutat. "Sot kemi një urim krejt të veçantë. Shtëpia e parë e rindërtimit hap dyert për familjen Allaraj, në ditëlindjen e Merisilda, e cila mbush 13 vjeç. Për pak humor, kjo është ajo shtëpia që kur vumë tullën e parë disa "inxhinierë" këtu, komentuan skeletin e saponisur prej hekuri të kolonave, duke vënë alarmin se ishte me "katër tela"! Ngutja e disave për të nxjerrë fjalën e keqe apo për të bërë "kompetentin" pa diplomën përkatëse, për çdo punë që komentojnë nga kafeneja, plazhi apo krevati ku luajnë me ajfonin e tyre është bërë si puna e atij vargut me hudhra, që vihet në hyrje të shtëpisë për të mos marrë m'sysh Kështu që duhen falenderuar pa ironi e as pishman edhe thurrësit e këtyre "hudhrave" digjitale, që e vranë syrin e keq mbi shtëpinë e familjes Allaraj, e cila sot nis jetën e re në një banesë tamam siç kemi premtuar, më të madhe, më të fortë, më të bukur, me urimin për ditëlindjen e Merisildes, që bashkë me vellain Merison, të mësojnë mirë, të bëhen të zotët e vetes e të kenë jetë e shëndet! Gëzuar" tha Edi Rama.