Nchimbi: Watanzania Komaeni mpate Katiba Mpya

Nchimbi: Komaeni mpate Katiba Mpya Makamu wa Rais, Dk Emmanuel Nchimbi amesema jambo kubwa ambalo Watanzania wanapaswa kulipa kipaumbele katika mjadala wa mageuzi ya kisiasa ni kupatikana kwa Katiba mpya, akisema ndiyo sheria mama inayoweza kubeba na kusimamia masuala mengine yote ya utawala bora nchini. Dk Nchimbi ameyasema hayo leo Ijumaa, Julai 24, 2026 jijini Dar es Salaam wakati wa Mkutano Mkuu wa Watetezi wa Haki za Binadamu (THRDC), ambapo amesema endapo angepewa nafasi ya kuwaambia Watanzania jambo moja pekee, angewaomba kuendelea kupigania kupatikana kwa Katiba mpya yenye ridhaa ya wadau wote. "Kama ningeambiwa Makamu wa Rais waambie Watanzania jambo moja tu, ningesema pambaneni mpate Katiba mpya. Katiba ambayo ina makubaliano ya wadau wote, Katiba yenye mwafaka katika taifa," amesema. Dk Nchimbi amesema wakati akiwa Katibu Mkuu wa CCM, aliwasilisha kwa aliyekuwa mwenyekiti wa chama hicho, Rais samia Suluhu Hassan maoni ya kamati ya ilani iliyokuwa imepewa jukumu la kukusanya maoni ya wananchi nchi nzima kuhusu mambo wanayoyataka, ambapo Katiba mpya ilikuwa miongoni mwa hoja kubwa zilizojitokeza. Amesema baada ya kamati hiyo kumueleza kuwa Watanzania wanataka Katiba mpya, alisisitiza umuhimu wa suala hilo kupewa nafasi katika ilani ya uchaguzi ya chama hicho, hasa kwa kuwa tayari kulikuwa na mgombea wa urais aliyekuwa akitarajiwa kuingia madarakani.