SERIKALI YA MKOA WA DAR YATAKIWA KUDHIBITI MALORI KWENYE MAKAZI

Serikali ya Mkoa wa Dar es Salaam imetakiwa kudhibiti malori yanayopaki katika makazi ya watu ili kuondoa kero kwa wakazi eneo husika. Msemaji Mkuu wa Serikali, Gerson Msigwa ametoa kauli hiyo leo Jumapili, Machi 16, 2025 wakati akizungumza na wanahabari baada ya kutembelea mradi wa kongani ya viwanda mkoani Pwani sambamba na Bandari Kavu ya Kwala iliyojengwa chini ya Mamlaka ya Usimamizi wa Bandari Tanzania (TPA). “Hivyo, lengo la bandari hii ni wafanyabiashara waje kuchukulia mizigo hapa, pia tunaendelea kutekeleza barabara ya mzunguko Dar es Salaam lengo ni kuhakikisha kuwa, malori ambayo yanaleta kero yanapita barabara ya mzunguko,” amesema. Msigwa amesema kupunguzwa kwa msongamano huo hakutawaondolea kero wananchi pekee bali hadi wafanyabiashara ambao kwa sasa wanakerwa na foleni hiyo. Bandari Kavu ya Kwala inatarajiwa kuhudumia kontena 823 kwa siku zikiwamo zinazokwenda nchi jirani ikiwa ni sawa na kontena 300,395 kwa mwaka, sawa na asilimia 30 ya kontena zinazohudumiwa na Bandari ya Dar es Salaam kwa sasa. Video na Khatibu Mgeja.