Doshi: Lazarati s’ është sukses i Tahirit - RTV Ora News- Lajmi i fundit-

Tiranë – Deputeti socialist Tom Doshi e ka konsideruar si përgjegjës, Ministrin e Brendshëm Saimir Tahiri për paaftësinë e Policisë së Shtetit për të kapur vrasësit e biznesmenit Artan Santo, në kushtet kur nuk është e pajisur me makina, motorrë apo radio. Për këtë shkak, ditën e vrasjes, postblloqet e Policisë nuk u arrit të ngriheshin deri në Bubq, afër Fushë Krujës, shtoi ai. Për më tepër akoma, duke i dalë në mbrojtje Policisë, Doshi ia ka “zhveshur” meritat Tahirit për operacionin në Lazarat, duke e konsideruar atë si një operacion që mund ta bënte kushdo dhe një sukses vetëm të policëve që sakrifikuan atje. Deklaratat e tij, Doshi i bëri pasdite në Komisionin e Ligjeve, kur sërish u hodh në diskutim, projektligji “Për Policinë e Shtetit”. Aty, me një dozë ironie, ai iu drejtua ministrit Tahirit, që pikërisht sot ka analizuar punën 300-ditore të Policisë së Shtetit.” “Ne, Ministrin tonë nuk mund ta biem këtu, sepse është shumë i zënë, por meqë ka pasur 300-ditëshin e suksesit të tij sot,” – tha Doshi, – unë do të bëj një pyetje: Përgjegjësia e kujt është – gjithmonë do përqëndrohem tek vrasja e biznesmenit Santo – që nuk kishte radio dhe nuk arritën postblloqet, deri atje në Bubs, në Fushë Krujë, t’i dalin para? Përgjegjësia e kujt është në këtë rast që policia nuk ka radio, s’ka benzinë, s’ka makinë? Përgjegjësia e kujt është? Kë do të ruajë ai nëse s’ka radio, s’ka makinë, s’ka benzinë, s’ka motorrë? Ç’është kjo mburrje e Ministrit të Rendit që del e thotë “kam bërë namin”?!” Duke kaluar në një çështje tjetër, Doshi vërejti: “Tani ne e dimë se Lazarati duhej t’u goditte, kushdo mund ta bënte, gjithkush mund ta bënte, nuk është sukses i Ministrit të Rendit, por i atyre policëve që shkuan dhe sakrifkuan atje. Unë jam gjithmonë në mbrojtje të policisë. Unë njoh shumë policë, ka pasur raste kur u kam dhënë edhe benzinë, se kanë mbetur në rrugë. Pra, çfarë suksesi dhe çfarë mbrojtje më ofron mua ky polici, nëse ai nuk ka benzinë, nuk ka radio për të kërkuar ndihmë? Përgjegjësia e kujt është kjo?”- ngriti pyetjen ai. Komisioni ka vazhduar edhe më pas me debate dhe diskutime. Për më shumë klikoni në http://www.oranews.tv/