နန်းတွင်းရေး အကျပ်အတည်း ကာလနဲ့ တိုက်ဆိုင်နေတဲ့ ထိုင်းဘုရင့်သားရဲ့ စိတ်ဝင်စားစရာ အိမ်ပြန်ခရီး

ပြည်ပမှာ နှစ်ရှည်လများ သွားရောက် ခိုလှုံနေသူ တဦးရဲ့ ဇာတိမြေဆီ ပြန်လာတဲ့ ခရီးစဉ်ကြောင့် ထိုင်းပြည်သူတွေကြားမှာ လှုပ်လှုပ်ခတ်ခတ် ဖြစ်နေတယ်ဆိုရင် သာမန် အခြေအနေမှာတော့ ဝန်ကြီးချုပ်ဟောင်း သက်ဆင် ရှီနာဝပ်ထရာကိုပဲ တွေးတော မြင်ယောင်ကြမှာ ဖြစ်ပါတယ်။ ဒါပေမဲ့ ၁၅ နှစ်အကြာမှာ ထိုင်းမြေကို ပြန်လည် ခြေချမယ့် အစီအစဉ်ကို သက်ဆင်က ရုတ်တရက် ရွှေ့ဆိုင်းသွားပါတယ်။ အဲဒီအစား ထိုင်းပြည်သူတွေ ထင်မှတ်မထားတဲ့ အလှည့်အပြောင်း တခုအဖြစ် အဝေးရောက် နိုင်ငံသား တယောက်ရဲ့ စိတ်ဝင်စားစရာ အပြန်ခရီးက အကောင်အထည် ပေါ်လာခဲ့ပါတယ်။