Rusiyadakı faciə təsadüfi deyil... Əli Kərimli: Azərbaycan vətəndaşı kimsəsiz kimi görünməməlidir

Rusiyadakı soydaşlarımızın faciəsi daha böyük imiş. Yekaterinburq şəhərində Daxili İşlər Nazirliyinin regional Baş İdarəsinin əməkdaşları və Rusiya Qvardiyasının Xüsusi Çevik Hücum Dəstəsi (SOBR) tərəfindən birgə keçirilən əməliyyat zamanı Səfərovlar ailəsindən öldürülənlərin sayı 5 nəfərə çatıb. Səfərovlar ailəsinin nümayəndəsi mətbuata bildirib ki, Səfərov qardaşları ağır işgəncə ilə öldürülüb. Əməliyyat zamanı xeyli soydaşımız da yaralanıb. Azərbaycan XİN bəyanat verərək "Rusiyadan məsələnin təxirəsalınmaz araşdırılmasını və bu qəbuledilməz zorakılığı törədənlərin məsuliyyətə cəlb olunmasını gözləyirik” desə də, Rusiya soydaşlarımızın kütləvi şəkildə öldürülməsinə görə heç kimi adekvat cəzalandırmayacaq. Rusiya güc strukturlarının bu vəhşi "əməliyyatının" özfəaliyyət, məmur özbaşınalığı olduğuna da qətiyyən inanmıram. Azərbaycan bütün azərbaycanlıların Vətəni olmağı, dünyanın hər yerində yaşayan vətəndaşlarını qorumağı bacarmalıdır. Güclü dövlət isə vətəndaşını başıqapazlı edən dövlət yox, vətəndaşına dünyanın hər yerində hörmət qoyulmasını təmin edə bilən dövlətdir.