Protesta/ Xhaferri: Ka sjellë revolucion! Daci: S'është e lehtë të rrëzohet qeveria!

Deputeti i Partisë Demokratike, Besard Xhaferri, ka komentuar zhvillimet e fundit politike dhe protestat e qytetarëve, duke i cilësuar ato si një sinjal të fortë të reagimit shoqëror dhe një “zgjim të nervit qytetar”. Në MCN Live, Xhaferri theksoi se protestat e organizuara nga qytetarët, dhe jo nga partitë politike, përfaqësojnë sipas tij një moment të rëndësishëm politik. Sipas tij, “protesta ishte lajmi më i mirë që mund të vinte në këtë situatë”, duke shtuar se “nervi qytetar është i vendosur për të dalë për të protestuar në ditë të njëpasnjëshme”. Ai vlerësoi faktin se nismat nuk po burojnë nga partitë politike, por nga vetë qytetarët. Ndërsa politologu Alban Daci tha përmes një lidhjeje të drejtpërdrejtë me studion e MCN Live se nuk është kaq e lehtë të rrëzohet qeveria Rama, pasi bashkë me të është një sistem i tërë interesash ekonomike dhe politike. Duke vijuar Daci tha se nëse Rama ikën, nuk do ikë vetëm, por me shumë të tjerë që kanë përfituar padrejtësisht. Më tej gazetari Mariglen Kume, në një analizë për 'MCN Live', vlerësoi se megjithëse protesta po tërheq vëmendje dhe mbështetje të konsiderueshme publike, ende nuk po shfaqen shenja të krijimit të një force të re politike që të kanalizojë këtë pakënaqësi qytetare.