Breza inxhinierësh të veprave të dritës

Ndërtimi i tre hidrocentraleve në kaskadën e lumit Drin është një histori suksesi dhe një faktor i rëndësishëm për zhvillimin ekonomik të Shqipërisë. Janë 40 vite punë heroike. Mijëra punëtorë, specialistë dhe drejtues kanë punuar për katër dekada, që nga projektimi e deri në vënien në shfrytëzim të këtyre veprave madhështore. Hidrocentrali i Vaut të Dejës, me 5 turbina dhe 250 megavat fuqi të instaluar, është vepra e parë hidroenergjetike mbi lumin Drin. Përveç mijëra punonjësve shqiptarë, një kontribut të vyer në ndërtimin e këtij hidrocentrali kanë dhënë edhe specialistët kinezë. Gjithashtu, edhe agregatet dhe shumë makineri e pajisje të kësaj vepre janë importuar nga Kina. Përvoja e fituar në Vau të Dejës shërbeu si një shkollë për hidrocentralet e Fierzës dhe Komanit, të cilët u ndërtuan në një terren më të vështirë dhe me kapacitet më të madh. Inxhinieri elektrik Luigj Pjetri është një ndër specialistët e parë të këtyre veprave, me një përvojë të gjatë mbi 50-vjeçare. Sot ai është anëtar i bordit drejtues të Korporatës Elektroenergjetike Shqiptare. Zoti Pjetri, me nostalgji, kthehet herë pas here në hidrocentralin e Vaut të Dejës, ku ka shtypur çelësin për vënien në punë të turbinës së parë në vitin 1970. Veprat e dritës, siç quhen hidrocentralet, janë shkolla ku formohen brezat e specialistëve të këtij sektori. Njëri prej tyre është edhe inxhinieri Kolec Gjeluci, i cili ka më shumë se tre dekada që punon si specialist dhe drejtues në sektorin energjetik. Përvoja ka qenë universiteti më i mirë për këtë inxhinier, i cili sot drejton sektorin e mirëmbajtjes në hidrocentralin e Vaut të Dejës. Ndiqni “Ejani Tiranë” dhe “Radio Ejani” Ndiqni kanalin “Ejani Tiranë” në YouTube: https://bit.ly/3CJultB Ndiqni “Radio Ejani” në Facebook: https://bit.ly/3AAPF3P Ndiqni “Radio Ejani” në Twitter: https://bit.ly/2W9VNB4 Shkarkoni aplikacionin “Ejani” në App Store: https://apple.co/2XDhmKC dhe Play Store: https://bit.ly/3CEdMPx Për më shumë klikoni në uebsajtin tonë: http://albanian.cri.cn/