鍾景輝追思會｜謝君豪 王祖藍 陳國邦獨角戲悼恩師 杜琪峯難忘King Sir提攜之恩

鍾景輝追思會｜謝君豪 王祖藍 陳國邦獨角戲悼恩師 杜琪峯難忘King Sir提攜之恩 一代戲劇大師 鍾景輝 上月3號安詳辭世，享年89歲。為咗緬懷King Sir對香港演藝界嘅貢獻，家屬特別於7月15號喺香港演藝學院為King Sir舉行追思會。追思會雖然冇對外開放，但就以公開直播方式，令廣大市民可以一齊紀念呢位戲劇巨匠。 King Sir一生桃李滿門，追思會上大批學生陸續到場致意，包括張繼聰、蘇玉華、潘燦良、張達明、劉雅麗、張錦程、蝦頭楊詩敏、張紋嘉與男友林子傑等，身型消瘦嘅 張達明 則坐輪椅到場。張繼聰表示，如果冇King Sir俾佢入學讀書，佢就唔會有整個演藝生涯，甚至之後有緣合作拍劇，有多啲傾偈機會，King Sir喺佢心中係永遠為後輩定下好好嘅標準。至於蘇玉華同潘燦良就話，作為學生都好唔捨得恩師，但最大損失唔係學生從失去老師，而係香港失去咗一位偉大嘅前輩。阿蘇更形容，King Sir好似喺每個學生心中放咗一粒種子，而呢樣嘢會不斷成長、不斷發芽，開花結果，呢樣亦係King Sir留俾大家最珍貴嘅嘢。 分別同King Sir合作過舞台劇同電視劇嘅 林保怡 與 曹永廉 呢日都有現身。阿廉表示最深刻係06年周King Sir合作《高朋滿座》，大讚對方係一位好君子嘅演員，唔會影響每個演員嘅演法，但如果大家問佢嘅話，佢會好樂意解答。阿廉仲分享當時曾問過King Sir一句：「我做得好唔好？」King Sir就答：「你把口係OK，但如果可以將對白由腦拉到落心講，就更加好。」呢段話亦令阿廉細味多時，明白到好多嘢都要用心對待。至於 姜大衞 同 樊亦敏 雖然未同King Sir合作過，但佢哋都好仰慕呢位前輩。 追思會以King Sir生前最心愛嘅戲劇之一《小城風光》風格作為主軸，由King Sir嘅姪仔 鍾至權 代表家屬致辭，學生 王祖藍、謝君豪、陳國邦及莫家堯 接力以獨角戲方式介紹King Sir嘅演藝成就，更以「蒲公英」用作比喻，形容King Sir一生燃燒自己點亮他人，而當風吹起蒲公英時，佢就會飛到大劇院舞台、排練室、電視台、不同劇作、每個演員同觀眾嘅心深處。而喺尾段，更播出King Sir曾經受訪嘅聲音：「嗰樣真係你真心鍾意嘅嘢嘅時候，你就會覺得，你所用嘅時間同精神都係值得。」嚟回應有人懷疑拍戲辛苦又搵唔到食，係咪值得嘅疑問。 包括導演 杜琪峯 在內嘅幾位嘉賓亦先後上台分享佢哋心目中嘅King Sir。杜琪峯難忘King Sir對自己嘅提攜之恩，50幾年前因一次機會，King Sir帶自己去利舞台，而因為呢一次加上King Sir嘅啟蒙指導，自己嘅第一份工就做到宜家，呢50幾年都覺得好享受同滿足，所以好感謝對方。 香港演藝學院嘅學生亦帶來演出，展現King Sir薪火相傳嘅教育成果。而喺現場派發嘅場刊，詳細紀錄King Sir輝煌嘅成就，當中仲有佢由細到大嘅珍貴相片。 為咗令廣大市民可以親身向King Sir致意，治喪委員會宣布16號特別加開公眾簽名活動同紀念展。將會展出King Sir嘅獎項、金句，以及珍貴嘅舞台服裝，現場更備有心意卡，供市民留言悼念。按家屬意願，追思會懇辭花圈、花籃。奠儀將全數撥捐香港演藝學院「鍾景輝紀念獎學金」，延續King Sir一生對培育演藝人才嘅無私奉獻，讓其精神薪火相傳 #鍾景輝 #追思會 #一代戲劇大師 #戲劇巨匠 #王祖藍 #謝君豪 #陳國邦 #張達明 #杜琪峯 #張達明 #桃李滿門 #演藝 #小城風光 #鍾景輝紀念獎學金 #紀念展 #薪火相傳#TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞 即刻Follow TVB 娛樂新聞台 Facebook專頁   / tvbenews   登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0