အီရန်နဲ့ အမေရိကန် လက်မှတ်ထိုးဖွယ်ရှိ ၊ နျူလက်နက်စွန့်ဖို့မရှိတဲ့မြောက်ကိုရီးယား | People's Spring

အီရန်နဲ့ သဘောတူ လက်မှတ်ရေးထိုးဖွယ်ရှိကြောင်း ထရမ့်ပြော ဇွန်လ- ၁၄ ၊၂၀၂၆ ။People’s Spring အီရန်နဲ့ အမေရိကန်ကြား စစ်ပြေငြိမ်းရေး ကနဦးအဆင့် သဘောတူညီမှု တစ်ခုကို ဇွန်လ ၁၄ ရက်နေ့မှာ လက်မှတ် ရေးထိုးနိုင်ဖွယ် ရှိနေကြောင်း အမေရိကန် သမ္မတ ဒေါ်နယ်လ်ထရမ့်က မှတ်ချက်ပေးခဲ့ပါတယ်။ အီရန်က အမေရိကန်နဲ့ ဆွေးနွေးမှုတွေ တိုးတက်နေကြောင်း အတည်ပြုခဲ့ပေမယ့် သဘောတူ လက်မှတ်ရေးထိုးမှု တစ်ခုခု လုပ်နိုင်မယ့် အချိန်ကို တိတိကျကျ မပြောနိုင်သေးဘူးလို့ မတင်မကျ ပြောနေပေမယ့် ထရမ့်က အခုလို ရက်သတ်မှတ်ပေးခဲ့တာ ဖြစ်ပါတယ်။ သဘောတူညီမှုကို မနက်ဖြန် လက်မှတ်ရေးထိုးကြမှာ ဖြစ်ကြောင်း၊ အဲဒီနောက် ချက်ချင်းဆိုသလို ဟောမုဇ် ရေလက်ကြားကို ပြန်ဖွင့်မှာဖြစ်ကြောင်း ဇွန်လ ၁၃ ရက်နေ့တုန်းက သူ့ကိုယ်ပိုင် လူမှုကွန်ရက် မီဒီယာ Truthမှာ ရေးသားထားခဲ့ပါတယ်။ အီရန်-အမေရိကန် ဆွေးနွေးမှုတွေမှာ အဓိက ကြားဝင် ကူညီပေးနေတဲ့ ပါကစ္စတန်ကလည်း ကနဦး သဘောတူညီမှုတွေကို နောက်ထပ် ၂၄ နာရီလောက်အတွင်း အပြီးသတ်နိုင်ဖွယ်ရှိပြီး အီလက်ထရောနစ် လက်မှတ်ရေးထိုးမှု နည်းလမ်းကို အသုံးပြုဖို့ စဉ်းစားထားကြကြောင်း ပြောပါတယ်။ ထရမ့်ရဲ့ ကြေညာချက် မတိုင်ခင်မှာတော့ အီရန် နိုင်ငံခြားရေး ဝန်ကြီးဌာန ပြောရေးဆိုခွင့်ရ အရာရှိ အက်မေလီ ဘက်ခ်ကိုင်က နားလည်မှု စာချွန်လွှာ (MoU) လက်မှတ်ရေးထိုးမယ့် တိကျတဲ့ ရက်စွဲနဲ့ ပတ်သက်ရင်တော့ စောင့်ကြည့်ရဦးမှာ ဖြစ်ကြောင်း၊ ဒါပေမဲ့ မနက်ဖြန်တော့ မဖြစ်နိုင်လောက်သေးကြောင်း မှတ်ချက်ပေးခဲ့ပါသေးတယ်။ ထရမ့်ကတော့ သဘောတူညီမှု ရယူအပြီး နောက်ထပ် သင့်တော်တဲ့ အချိန်ကာလ တစ်ခုမှာ အီရန်ဆီက နျူကလီးယား အမှုန်တွေကို ရယူဖို့ စီစဉ်ထားကြောင်းလည်း ဆိုပါတယ်။ နျူကလီးယား အမှုန်တွေ ဆိုတာဟာ အီရန်ရဲ့ သန့်စင်ပြီး ယူရေနီယမ် ဓာတ်သတ္တုတွေကို ရည်ညွှန်းတာ ဖြစ်နိုင်ပါတယ်။ အမေရိကန်နဲ့ အနောက်နိုင်ငံတွေက အီရန်ဟာ နျူကလီးယား စစ်လက်နက်တွေ တည်ဆောက်ဖို့ ကြိုးစားနေကြောင်း ဆယ်စုနှစ်တွေနဲ့ချီ စွပ်စွဲတာ ခံခဲ့ရပါတယ်။ ဒါပေမဲ့ အီရန်ကတော့ အစဉ်တစိုက် ငြင်းဆိုခဲ့ပြီး နိုင်ငံရဲ့ နျူကလီးယား နည်းပညာ ရည်မှန်းချက်ဟာ စွမ်းအင်ကဏ္ဍအတွက် ငြိမ်းငြိမ်းချမ်းချမ်း အသုံးပြုဖို့သာ ဖြစ်တယ်လို့ ကာကွယ် ပြောဆိုခဲ့ပါတယ်။ ထရမ့်က ဆွေးနွေးမှုတွေက ခပ်မြန်မြန်၊ လွယ်လွယ်ကူကူ၊ ချောချောမွေ့မွေ့ အဆုံးမသတ်နိုင်ဘူးဆိုရင် အမေရိကန်မှာ အရမ်း အားကောင်းတဲ့ နောက်ထပ် ရွေးချယ်စရာတွေ စီစဉ်ထားကြောင်း၊ ဒါပေမဲ့ အဲဒီ ကိစ္စတွေကို နောက်တစ်ကြိမ် ထုတ်မသုံးရဖို့ မျှော်လင့်ကြောင်းလည်း ခြိမ်းခြောက်သွားပါတယ်။ အီရန်နဲ့ အမေရိကန်တို့ဟာ ဖေဖော်ဝါရီ ၂၈ ရက်နေ့ကနေ ဧပြီ ၇ ရက်နေ့ထိ စစ်ဖြစ်ခဲ့ပြီး ဧပြီ ၈ ရက်နေ့ ကတည်းက အပစ်အခတ် ရပ်စဲထားခဲ့တာပါ။ အဲဒီ အချိန်ကစလို့ ငြိမ်းချမ်းရေး ဆွေးနွေးမှုတွေ လုပ်ဆောင်နေပေမယ့် တိုးတက်မှုတွေ နှေးကွေးနေခဲ့တာ ဖြစ်ပါတယ်။ ဒါပေမဲ့ ပြီးခဲ့တဲ့ ရက်ပိုင်းတွေမှာတော့ ဆွေးနွေးမှုတွေ အခြေအနေ ကောင်းလာကြောင်းကို နှစ်ဖက်စလုံးက အတည်ပြုခဲ့ပါတယ်။ ဇွန်လ ၁၂ ရက်နေ့မှာတော့ အီရန် နိုင်ငံခြားရေး ဝန်ကြီး အဘက်စ် အာရက်ချီကလည်း အမေရိကန်နဲ့ သဘောတူညီမှု တစ်ခုခု ရရှိဖို့ အရမ်းနီးကပ်လာနေကြောင်း မှတ်ချက်ပေးခဲ့ပါတယ်။ အဲဒီ သဘောတူညီမှုမှာတော့ စစ်ပွဲကြောင့် အီရန် ပိတ်ထားတဲ့ ဟောမုဇ် ရေလက်ကြားကို ပြန်ဖွင့်ရေးကလည်း အဓိက အချက်တစ်ခု ဖြစ်လာလိမ့်မယ်လို့ သူက ပြောကြားသွားပါတယ်။ ===== နျူကလီးယား လက်နက်တွေကို လုံးဝ စွန့်လွှတ်မှာ မဟုတ်ကြောင်း မြောက်ကိုရီးယား သတိပေး ဇွန်လ- ၁၄ ၊၂၀၂၆ ။People’s Spring နျူကလီးယား လက်နက်နိုင်ငံအဖြစ် ရပ်တည်မှုကို ဘယ်တော့မှ ရုပ်သိမ်းမှာ မဟုတ်ဘူးလို့ မြောက်ကိုရီးယားက ပြိုင်ဘက် နိုင်ငံတွေကို ရည်ရွယ်ပြီး သတိပေးလိုက်ပါတယ်။ တောင်ကိုရီးယား၊ ဂျပန်နဲ့ အမေရိကန်တို့က ဂျပန်နိုင်ငံ၊ တိုကျိုမြို့တော်မှာ သုံးနိုင်ငံ အစည်းအဝေးတစ်ခု ကျင်းပပြီးချိန်မှာ မြောက်ကိုရီးယားဖက်က အခုလို သဘောထားမျိုး ထုတ်ပြန်ခဲ့တာ ဖြစ်ပါတယ်။ အစည်းအဝေး အတွင်းမှာတော့ မဟာမိတ် သုံးနိုင်ငံက ကိုရီးယားကျွန်းဆွယ်မှာ နျူကလီးယားလက်နက် ကင်းစင်ရေး ရည်မှန်းချက်ကို အင်တိုက်အားတိုက် ဆက်လက် အကောင်အထည် ဖော်သွားဖို့ သဘောတူခဲ့ကြပါတယ်။ မြောက်ကိုရီးယားဟာ နျူကလီးယား လက်နက်တွေကို စွန့်လွှတ်မှာ မဟုတ်တဲ့အကြောင်း အရင်ကလည်း ပြောဆိုခဲ့ဖူးပြီး ဇွန်လ ၁၄ ရက်နေ့ ထုတ်ပြန်ချက်မှာတော့ နျူကလီးယား လက်နက်တွေ ပိုင်ဆိုင်ရေးဟာ ဒေသတွင်း တည်ငြိမ်မှုအတွက်လည်း အရေးအရေးကြီးကြောင်း ဖော်ပြထားခဲ့ပါတယ်။ ပြီးတော့ အမေရိကန်နဲ့ မဟာမိတ် နိုင်ငံတွေက တောင်းဆိုတဲ့ နျူကလီးယားလက်နက် ဖျက်သိမ်းရေး အဆိုပြုချက်ကိုလည်း ယတိပြတ် ပယ်ချခဲ့ပါတယ်။ လဆန်းပိုင်းတုန်းကလည်း မြောက်ကိုရီးယား ခေါင်းဆောင် ကင်မ်ဂျုံအွန်းရဲ့ ညီမလည်းဖြစ်၊ မြောက်ကိုရီးယား အစိုးရ အဖွဲ့ထဲမှာ ဩဇာအကြီးဆုံး အမျိုးသမီးလို့ သတ်မှတ်ခံထားရသူလည်းဖြစ်တဲ့ ကင်မ်ယိုဂျောင်က နျူကလီးယား လက်နက်တေ ပိုင်ဆိုင်ခြင်း ဆိုတာဟာ မြောက်ကိုရီးယားက နောက်ပြန်မလှည့်မယ့် စည်းမျဉ်းတစ်ခု ဖြစ်တယ်လို့ ပြောကြားဖူးပါတယ်။ အမေရိကန်နဲ့ လက်ပါးစေ နိုင်ငံတွေဟာ မြောက်ကိုရီးယားနဲ့ ပတ်သက်လို့ အဓိပ္ပါယ် မရှိတာတွေ ပြောဆိုနေကြောင်း၊ မြောက်ကိုရီးယားဟာ နျူကလီးယား လက်နက်နိုင်ငံ တစ်ခုအဖြစ် ရပ်တည်နေခြင်းကနေ လုံးဝ နောက်ကြောင်း ပြန်လှည့်မှာ မဟုတ်ကြောင်း မြောက်ကိုရီးယား အစိုးရ အရာရှိ တစ်ဦးကလည်း အစိုးရပိုင် KCNA သတင်းဌာနဆီကို ပြောကြားသွားခဲ့ပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ထရမ့် #အီရန် #အမေရိကန်နှင့်အီရန် #နိုင်ငံတကာသတင်း #သဘောတူညီချက် #Trump #Iran #USIran #TrumpIranDeal #InternationalNews #BreakingNews #မြောက်ကိုရီးယား #နျူကလီးယားလက်နက် #နိုင်ငံတကာသတင်း #ကမ္ဘာ့သတင်း #စစ်ရေးတင်းမာမှု #NorthKorea #KimJongUn #NuclearWeapons #InternationalNews #BreakingNews