CRDB YAIMARISHA AFYA ZA WAFANYAKAZI KUPANDISHA TIJA YA KAZI

CRDB YAIMARISHA AFYA ZA WAFANYAKAZI KUPANDISHA TIJA YA KAZI Benki ya CRDB imeendelea kuwekeza katika ustawi wa wafanyakazi wake kwa kuendesha programu ya afya na mazoezi (Wellness Programme) inayowakutanisha zaidi ya wafanyakazi 800 wa kanda za Dar es Salaam na Pwani kwa ajili ya vipimo vya afya, elimu ya lishe na mazoezi, ikiwa ni sehemu ya mkakati wa kuongeza tija na kupunguza athari za magonjwa yasiyoambukiza mahali pa kazi. Akizungumza jijini Dar es Salaam leo Kaimu Mkurugenzi Mtendaji wa CRDB, Brusi Mwile, amesema benki inaamini kuwa wafanyakazi wenye afya bora ndiyo msingi wa utoaji wa huduma zenye ubora na ukuaji endelevu wa taasisi. Naye Meneja wa Rasilimali Watu wa CRDB, Timothy Fasha, amesema programu hiyo ambayo imefikia msimu wake wa sita na kufanyika kwa mwaka wa nane sasa, inalenga kuwajengea wafanyakazi utamaduni wa kufanya mazoezi na kufahamu vihatarishi vya magonjwa yasiyoambukiza kama shinikizo la damu, kisukari na saratani,amesema mpango huo unatekelezwa katika matawi yote ya benki nchini, Zanzibar na Burundi, huku wataalamu wa afya na lishe wakitoa huduma na ushauri wa kitaalamu. Kwa upande wake, Msimamizi wa Idara ya Wellness kutoka kampuni ya Care Health & Hospitality Services, Jovicus Masalu, amesema ongezeko la magonjwa yasiyoambukiza miongoni mwa wafanyakazi wa ofisini limekuwa changamoto inayopunguza uzalishaji, hivyo ushirikiano wao na CRDB unalenga kutoa vipimo vya afya, ushauri wa lishe na kuhamasisha mabadiliko ya mtindo wa maisha ili kuimarisha afya za wafanyakazi na familia zao. Programu hiyo imejumuisha vipimo vya shinikizo la damu, sukari, uzito, urefu na ushauri wa kitaalamu kutoka kwa madaktari bingwa, wataalamu wa lishe na wakufunzi wa mazoezi, huku CRDB ikisisitiza kuwa uwekezaji katika afya ya wafanyakazi ni sehemu ya mkakati wa kujenga nguvu kazi yenye ufanisi, kupunguza gharama za matibabu na kuongeza tija ya huduma za benki kwa muda mrefu.