كيد الرقاصة أسقط مجرم غامض! | #بودكاست_أوراق_القضية

اللوا أشرف عبد العزيز حل ألغاز القضية دي، إلا لغز الست الكبيرة اللي راح خبط عليها علشان إعادة المسروقات. ففتحت له من غير سابق معرفة ولا إخطار، وقالت له "إزيك يا أشرف ..." ولما سألها عرفت اسمه إزاي جاوبت إجابة عقله لغاية دلوقتي ماستوعبهاش. الحكاية دي كلها بدأت لما واحد اسمه نبيل كان بيتردد على كباريه يعرف رقاصة فيه، وبيصرف كل يوم خمسين ألف جنيه. بعد شوية اتعرف على زبونة في المحل فساب الرقاصة ومشي معاها. فالرقاصة غارت. وقررت تنتقم منه. فسربت للشرطة إخبارية إن فيه زبون مريب بيصرف مبالغ جنونية كل يوم. لكن ما تعرفش عنه أي حاجة غير إن اسمه نبيل. وإنه دايما شايل طبنجة، وبيقول إنه موظف كبير في موقع مهم. آه. ومش ممكن يكون تاجر مخدرات وعندها الدليل. 📍 المكان: الجيزة والقاهرة ⏳ الزمان: 2008 🔥الحكاية: "مجرم مايخرش المياه. غلط غلطة عمره ومشي مع صاحبة صاحبته! المباحث في البداية استغربت البلاغ، ارتابوا يكون تاجر مخدرات. بس الرقاصة قالت بثقة مش ممكن. أنا قصدته. ورد علي رد ما يردوش تاجر. ولا حتى متعاطي. سألوها عن عربيته، قالت إنه لسه شاري "جيب شروكي" جديدة من أسبوع، وصورت لهم النمرة بتاعة العربية،. ولما كشفوا على نمرة العربية كانت الصدمة .. العربية الزيرو اللي نبيل لسه شاريها، طلعت مسروقة، وفيه بلاغ بسرقتها! ومن هنا القصة بقت جد، وبدأ التخطيط لنصب الكمين... الشرطة بدأت تراقب تحركاته من أول ما بيخرج من الملهى الليلي، لحد ما بيتحرك من الهرم للمعادي على الطريق الدائري، وهناك نصبوا كمين عند المنيب، واستنوه لحد ما دخل عليهم ومعاه صديقته الجديدة. وقفوه، وقالوا له: "العربية دي فيه بلاغ بسرقتها .. معاك رخص؟" نبيل وشّه جاب ألوان في لحظة، ونزل من العربية وهو مرعوب، ولما فتشوه، لقوا معاه الطبنجة في جنبه، والمفاجأة الكبيرة كانت في العربية ورا .. "شنطة سودة سامسونايت". أول ما المباحث فتحت الشنطة لقت قدامها "مغارة علي بابا": دهب، وبطاقات وكارنيهات بأسماء وهمية كتير. و ٣ كروت فيزا. وكانت الشنطة دي هي الصندوق الأسود لكل جرايمه. التحقيقات مع نبيل كانت بالساعات، وهو ساكت مبينطقش بكلمة في التحقيق،المفاجأة إنه اتمسك قبل كده وطلع بنفس الطريقة. مابينطقش حرف. ومافيش عليه خيوط. رئيس المباحث عرف كده من زمايله. لحد ما بدأت المباحث تحل لغز الشنطة السامسونايت واحدة واحدة .. الشنطة كان فيها 3 كروت فيزا لـ 3 بنوك مختلفة .. طلبوا من البنوك بصفة ودية يكلموا أصحاب البطاقات دي يسألوهم عن بلاغات سرقة بدون إفشاء أي أسرار شخصية ليهم، ولو كده يروحوا يقابلوا رئيس المباحث .. التلاتة أكدوا إن شققهم وشركاتهم وعربياتهم اتسرقت! وادوا مواصفات للمسروقات. .. لما فتشوا بيت "نبيل" لقوا دهب ومسروقات أكتر، وأجهزة كمبيوتر كانت هي الخيط اللي وصلهم لكل صاحب شقة مسروقة، ومن هنا بدأت القضايا تفرط زي "عنقود العنب" لحد ما وصلوا لـ 42 بلاغ سرقة!... لما واجهوه بالمسروقات دي كلها وضغطوا عليه، بدأ يعترف واحدة واحدة... نبيل كان عنده طقوس غريبة في السرقة الشرطة بتسميها "بصمة": كان مثلا بيلزق منديل ورق على "العين السحرية" للشقق اللي قدام الشقة اللي بيسرقها عشان محدش يشوفه. كان يحط "سلك شعر" رفيع جدا في كالون باب الشقة اللي ناوي يسرقها يوم الخميس، ويرجع الجمعة، لو السلك وقعت يبقى أصحاب الشقة رجعوا، فيهرب فوراً، ولو لسه مكانها يبقى أصحاب الشقة مسافرين .. فيدخل يسرق وهو مطمن! العربية الشيروكي جات بالصدفة. في مرة وهو بيسرق شقة لقى ريموت عربية، نزل جربه في الشارع، العربية زمرت، ركبها ومشي.. وهي اللي جابت رجله! القضية كانت صعبة لكن اتحلت، واتفصصت. اللغز الوحيد الباقي فيها هو لغز الست المسنة اللي ندهت رئيس المباحث باسمه من غير سابق معرفة. . وقالت له كأنها مستنياه "أنت أشرف؟ اتفضل يا ابني"!. الظابط جسمه قشعر من الصدمة!، وسألها بذهول: "أنت تعرفيني منين يا أمي؟!" هتلاقي التفاصيل كاملة ونخاية نبيل في الفيديو ده 👇 ولو عاوز تعرف كواليس مجموعة جديدة من الوقائع الجنائية اللي هزّت مصر خلال مسيرة اللواء أشرف عبد العزيز. ومنها قصة خنوفة، بلطجي مصر القديمة، اللي عمل نفسه زعيم بعد أحداث يناير وكان بيتحرك بكتيبة مريدين حواليه .. شوف الحلقة كاملة في أول تعليق 👇