ప్రాతఃకాల మంత్రాలు అర్థసహితం..

ఓ3మ్ ప్రాతరగ్నిం ప్రాతరింద్రం హవామహే ప్రాతర్మిత్రావరుణా ప్రాతరశ్వినా ! ప్రాతర్పగం పూషణం బ్రహ్మణస్పతిం ప్రాతః సోమముత రుద్రం హువేమ ॥ ౧॥ ఋగ్.౭-౪౧-౧॥ స్వప్రకాశ స్వరూపుడు, ఐశ్వర్యశాలి, ప్రాణమువంటి : మిత్రుడు, వరించదగినవాడు, సర్వవ్యాపకుడు, సర్వాంతర్యామి, సకల ప్రాణులకు పోషకుడు, సకల లోకముల నుత్పన్నము చేయువాడు, ప్రేరకుడు, దుష్టులను శిక్షించువాడు నగు పరమాత్ముని ప్రాతఃకాలము ప్రశాంతసమయమున ఉపాసింపవలయును. ప్రాతర్జితం భగముగ్రం హువేమ వయం పుత్రమదీతే ర్యో వీధర్తా । ఆధ్రశ్ఛిద్యం మన్యమానస్తురశ్చిద్ రాజా చిద్యం భగం భక్షీత్యాహ ॥ ౨॥ ఋగ్.౭-౪౧-౨॥ ఉదయము నిద్రలేవగానే జయశీలుడు, ఐశ్వర్యదాత, తేజస్వరూపుడు, బ్రహ్మాండమును పవిత్రము చేయువాడు, అనేక విధముల ధరించువాడు నగు పరమాత్ముని ఉపాసింపవలయును. ఏలన అతడు ప్రపంచమును, మనలను ధరించును. అతడు సర్వజ్ఞుడు, దుష్టులను శిక్షించు వాడు, స్వయముగ ప్రకటితమైనవాడు, పూజనీయుడు. అతనినే ఉపాసింప వలయును. అతని స్వరూపమునే మానవుల కుపదేశింపవలయును. భగ ప్రణేత్తర్భగ సత్యరాధో భగేమాం ధియముదవా దదన్నః | భగ ప్ర ణో జనయ గోభిరశ్వైర్ భగ ప్ర నృభిర్ నృవన్తః స్యామ ||౩ || ఋగ్ ౭-౪౧-౩ ॥ సకల సుగుణములు, సకలైశ్వర్యములుగల ఉపాసింప దగిన ఓ ప్రభూ! నీవు మాకు ఉత్తమ బుద్ధిని ప్రసాదించి మమ్ము కాపాడుము. మమ్ము పాడి పంటలను ఇచ్చు గోవులు, గుర్రములు మున్నగు పశువులతోను ఉత్తమ మానవులతోను సంపన్నులను జేయుము. ఉతేదానీం భగవన్తః స్యామో త ప్రపిత్వ ఉత మధ్యే అహ్నామ్| ఉతో దితా మఘవన్ త్సూర్యస్య వయం దేవానాం సుమతౌ స్యామ ||౪ || ఋగ్ ౭-౪౧-౪॥ ఉత్తమ ధనములకు నిలయమగు నో భగవన్! మేము ఈ ప్రశాంత సమయమున సూర్యోదయమున, దినములో ఎల్లవేళల జ్ఞానము, ధర్మము మున్నగు ధనములతో ఒప్పుదుముగాక! ఎల్లప్పుడు మేము ఉత్తమ బుద్ధిమంతుల బుద్ధికి అనుకూలముగా ఆచరింతుము గాక! భగ ఏవ భగవాఁ అస్తు దేవాస్ తేన వయం భగవన్తః స్యామ | తం త్వా భగ సర్వ ఇజ్జోహవీతి స నో భగ పుర ఏతా భవేహ ॥ ౫॥ ఋగ్ ౭ -౪౧-౫|| సకలైశ్వర్యములకు అధిపతియగు పరమేశ్వరుడే ఉపాసింపదగినవాడు. అతని కృప ( ఉపాసన) వలననే మానవులు ఉత్తమ ఐశ్వర్యవంతులగుదురు. అందరు అతనినే ఉపాసించుచున్నారు. అతడే సకల మానవులకు మార్గదర్శకుడు. #ప్రాతఃకాలమంత్రాలుఅర్థసహితం #vaidikmorningmantras #morningvedamantras #morningprayerstelugu #vaidikmorningprayerstelugu #prathahkalamantrasTelugu #ప్రాతఃకాలమంత్రాలు