Tv Klan - Kabllot ajrore nëpër qytete do të hiqen

Shumë shpejt nuk do të ketë më kabllo ajrore të telefonisë të varura si rrjeta merimangash nëpër lagje dhe rrugë. Qeveria ka lançuar një nismë të re që synon modernizimin e infrastrukturës së komunikimeve elektronike. Kryeministri Edi Rama, që foli për rëndësinë e kësaj nisme në takimin me 61 kryebashkiakët, u tërhoqi vëmendjen disa prej tyre se qëndrojnë në Tiranë, ndërkohë që duhet të ishin në zyrat e tyre në qytetet ku janë zgjedhur. 70 përqind e kabllove të shërbimeve telefonike dhe ato të internetit janë ajrore, varen nëpër mure pallatesh dhe lagje në të gjithë vendin, ndërsa vetëm 30 përqind e tyre janë me fibra optike të shtrira nëntokë. Një pjesë e madhe e tyre, siç pohon Ministrja e Infrastrukturës, janë harruar aty të varura edhe pse kanë dalë jashtë funksionit. Për këtë arsye, qeveria, kompanitë celulare dhe bashkitë do të nisin një projekt për evidentimin dhe më pas heqjen e këtyre telave që ngjajnë me rrjetat e merimangave, të cilat jo rrallë herë janë kthyer edhe në “atraksion” për turistët e huaj. “Është tanimë plotësisht e mundur që të pastrojmë qytetet tona nga gjithë ato fije plastike merimangash të një kohe, e cila ka pasur pasojat e veta në vazhdën e një zhvillimi që po ashtu ishte i domosdoshëm. Faktikisht, siç e tregon edhe inventari i bërë, pjesa dërrmuese e këtyre kabllove janë pa funksion. Janë pa funksion, por qëndrojnë aty tërësisht si një shenjë e harresës dhe e mungesës së vëmendjes”. Kryeministri, duke përfituar nga prania e kryebashkiakëve, zbuloi edhe disa nga projektet e pritshme të renditura në manifestin Rilindja Urbane 2, që do të përfshijë investime në kanalizime e ujësjellës, transportin urban, parkingje, si dhe rijetëzimin e ambienteve të ish-zonave industriale. “Të adresojë të gjitha pjesët e mbetura të sistemit, pra të pa investuara. Janë disa pjesë të cilat, ndryshe nga çfarë hidhet e spërdridhet në diskursin e përditshëm negativ, janë në fakt më pak, shumë më pak sesa pjesët e investuara të sistemit të ujësjellës-kanalizimeve. Do të adresojmë nevojën për të çuar në një nivel tjetër transportin urban dhe ndër-urban, duke nisur nga transporti i domosdoshëm dhe faktikisht hallka më e dobët e sistemit tonë të industrisë së re të turizmit, që është transporti i periudhës së sezonit të pikut. Do të aksesojnë bankat me projekte specifike të parkimeve, apo të bashkëpunojnë me subjektet private, të cilat do të jenë të ftuara të marrin pjesë në bashkëpunim në ato territore brenda lagjeve që i përdorin aktualisht për parkime shqetësuese dhe ndotëse, ku faktikisht kanë marrë të drejtën e pronës, por mund të angazhohen për të ndërtuar një infrastrukturë parkimesh shumë më fitimprurëse dhe njëkohësisht shumë miqësore me komunitetin”. Meqë iu dha rasti pasi i kishte të gjithë përballë, Rama nuk ngurroi t’u thoshte përpara kamerave disa prej kryebashkiakëve se po abuzojnë dhe, në vend që të shkojnë në zyrat e tyre në qytetet ku janë zgjedhur, po qëndrojnë më shumë në Tiranë ku kanë banimin. Por nuk tha kush janë. Ata që kanë bërë “balte” duhet të reflektojnë, nëse nuk duan t’u lexohet emri publikisht në takimin e ardhshëm. “Është shumë e rëndësishme që kjo praktikë të marrë fund. Sot nuk dua t’i përmend me emër, por herën tjetër do duhet t’i përmend me emër dhe publikisht, që lënë komunitetin dhe detyrën përpara se sa të vijë momenti zyrtar i pushimit, që edhe aty ha diskutim kjo punë, dhe vijnë në Tiranë. Janë në aksin Tiranë-Korçë”. Tv Klan SUBSCRIBE to “RTV KLAN” on YouTube for more videos! Email: [email protected] Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/