Marguerite Barankitse's Interview in Kirundi

Kaze neza kuri Amjambo Africa. Uyu musi tubazaniye ikiganiro kidasanzwe ku ngingo ihambaye cane: impunzi n'abimukira. Kw'isi yose, hari ama miliyoni y'abantu bahatirwa kuva mu bihugu vyabo, bagahunga intambara, ihamwa, ubwicanyi, ibiza n'ibindi bibazo bikomeye. Ariko inyuma y'ivyo bitigiri, hari abantu nyabo, hari ubuzima, hari n'inkuru zibabaje zirimwo ukwihangana kutamenywa na benshi. Mbega impunzi ni nde? Umwimukira ni nde? Ni izihe ngorane bahura na zo iyo bashaka ubuhungiro canke ubuzima bushasha mu kindi gihugu? Kandi ni uwuhe musanzu canke intererano bashobora gutanga mu bihugu bibakira? Ibi ni vyo tuganirako n'umutumire w'iteka, Marguerite Barankitse, azwi cane kw'isi yose nka « Mama Tereza wa Afrika ». Ni Umurundikazi amaze imyaka irenga cumi n'umwe aba mu buhungiro. Ni we yatanguje Maison Shalom na Fondation Marguerite Barankitse, akaba yarahariye ubuzima bwiwe gukingira no gufasha abana, abatishoboye n'abandi bose bugarijwe n'ingorane, haba mu Burundi canke mu makambi y'impunzi hirya no hino muri Afrika. Iki kiganiro cakozwe inyuma y'aho yaherewe Impamyabushobozi y'Icubahiro ya munani (Doctorat Honoris Causa) na Notre Dame University, iri mu gisagara ca South Bend, muri Leta ya Indiana, muri Amerika. Iyo ni imwe muri za kaminuza zizwi kandi zubashwe cane muri Amerika. Murakoze kugumana natwe.