ሰዓታት፤ ይዌድስዋ መላእክት

ይዌድስዋ መላእክት ለማርያም በዉስተ ዉሥጤ መንጦላዕት፡ ወይበልዋ በሐኪ ማርያም ሐዳስዩ ጣዕዋ። ይቤላ መልአክ ለማርያም ተወከፈዮ ለቃል ኅቤኪ ይመጽእ ወበማኅፀነ ዚአኪ የኅድር፡ እፎ ቤተ ነዳይ ኅደረ ከመ ምስኪን እምሰማያት ወረደ ላዕሌሃ ፈቲዎ ሥነ ዚአሃ ወተወልደ እምኔሃ። ወበሳድስ ወርኅ ተፈነወ ገብርኤል መልአክ እምኅበ እግዚአብሔር ኅበ አሐቲ ሀገር ዘገሊላ እንተ ስማ ናዝሬት ኅበ ድንግል እንተ ተፍኅረት ለብእሲ ዘስሙ ዮስፍ ዘእምቤተ ዳዊት፡ ወስማ ለይእቲ ድንግል ማርያም፡ ቦአ መልአክ ኅቤሃ ወይበላ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ፡ ብርክት አንቲ እምአንስት ወርእያ ደንገፀት እምቃሉ ወሐለየት ወትቤ፡ እፎኑ ከመዝኑ እንጋ አምኃ ይትአምኁ ወይበላ መልአክ ኢትፍርሂ እስመ ረከብኪ ሞገሰ ብኅበ እግዚአብሔር ወናሁ ትፀንሲ ወትወልዲ ወልደ ወትሰምዩዮ ስሞ ኢየሱስ ዉእቱ ዐቢይ ወይትሰመይ ወልደ እግዚአብሔር ልዕል። ወይሁቦ እግዚአብሔር አምላክ መንበረ ዳዊት አቡሁ።ወይነግሥ ለቤተ ያዕቆብ ለዓለም ወአልቦ ማኅለቅት ለመንግስቱ፡ ትቤሎ ማርያም መልአክ እፎኑ ይከዉነኒ ዘንቱ እንዘ ኢየአምር ብእሴ እፎኑ ይከዉነኒ አዉሥኦ መልአክ ወይቤላ መንፈስ እግዚአብሔር ቅዱስ ይመጽእ ላዕሌኪ ወኃይለ ልዑል ይጸልለኪ ዘኒ ይትወለድ እምኔኪ ቅዱስ ዉእቱ ወይሰመይ ወልደ እግዚአብሔር ልዑል፡ ወናሁ ኤልሳቤጥኒ እንተ እመአዝማድኪ ይእቲ ፀንሰት ወረከበት ወልደ በልኅቃቲሃ ወበርሥዐቲሃ ፡ ወናሁ ሳድስ ዝንቱ ወርኅ ለእንተ ይብልዋ መካን እስመ አልቦ ነገር ዘአይሰአኖ ለእግዚአብሔር፡ ትቤሎ ማርያም ለመለክ ነየ አመቱ ለእግዚአ ኩሉ ነየ አመቱ።ይኩነኒ በከመ ትቤለኒ። ይቤላ መልአክ ሰላም ለኪ፡ ይቤላ ገብርኤል ሰላም ለኪ ማርያም ድንግል ሰላም ለኪ፡ ወላዲተ አምላክ ሰላም ለኪ፡ ማርያም ቅድስት ሰላም ለኪ፡ ማርያም ዉድስት ሰላም ለኪ፡ ማርያም ፍሥሕት ሰላም ለኪ፡ ማርያም ብፅዕት ሰላም ለኪ፡ ማርያም ቡርክት ሰላም ለኪ፡ ማኅደረ መለኮት ሰላም ለኪ፡ ደብተራ ፍጽምት ሰላም ለኪ፡ እኅተ መላእክት ሰላም ለኪ፡ ወእመ ኩሉ ሕዝብ ሰላም ለኪ፡ እግዚእትነ ማርያም ሰላም ለኪ፡ ሰላማዊት ሰላም ለኪ፡ ቀደሰኪ ለማህደሩ ልዑል ሰላም ለኪ፡ አብደረኪ ወኅረየኪ ከመ ትኩኒዮ ማኅደሮ ሰላም ለኪ፡ በአልባሰ ወርቅ ዑፅፍት ወኁብርት ሰላም ለኪ። ክነፈ ርግብ በቡሩር ዘግቡር ሰላም ለኪ፡ ወገበዋቲሃኒ በሐመልማለ ወርቅ ማርያም ሥርጉት ሰላም ለኪ፡ ኆኅተ ምሥራቅ ወእሙ ለብርሃን ሰላም ለኪ፡ ትበርሂ እምፀሓይ ወትትሌዐሊ እምአድባር ሰላም ለኪ፡ ማርያም ኅርት ወክብርት ሰላም ለኪ፡ ሰአሊ ለነ ኅበ እግዚእነ ወመድኃኒነ ኢየሱስ ክርስቶስ፡ ከመ ያድኅነነ እመ ይመጽእ በስብሐተ አቡሁ ምስለ መላእክቲሁ ቅዱሳን፡ እመ ያቀዉም አባግዐ በየማኑ ወአጣሌ በፀጋሙ፡ ያቁመነ በየማኑ ምስለ እስጢፋኖስ ሰማዕት ወዮሐንስ መጥመቅ። ወምስለ ኩሎሙ ቅዱሳን ወሰማዕት ለዓለመ ዓለም አሜን። ከምሥራቀ ፀሐይ ቅዱስ ተክለ ሃይማኖት ቤተ ክርስቲያን, Alexandria, VA