Arratisje me “Audi Q8” në Tiranë – Kush është 26 vjeçarja e shumëkërkuar që i shpëtoi policisë

https://drita.tv Një ndjekje spektakolare nga policia rrugore e Tiranës ka përfunduar me përplasje makinash në rrugët e kryeqytetit. Drejtuesi e mjetit luksoz dyshohet të jetë Joni Sadikaj, një emër i njohur për drejtësinë, ndërsa bashkëpunëtori i tij Skerdi Sina u arrestua në flagrancë me armë dhe dokumente të falsifikuara. Policia po vijon kërkimet për kapjen e 26-vjeçares, e cila rezulton e përfshirë në një tjetër ngjarje të rëndë kriminale në janar të këtij viti. Një ndjekje me skena si në filma në rrugët e Tiranës përfundoi me përplasjen e tre automjeteve dhe sekuestrimin e një sasie droge, armësh dhe pajisjesh komunikimi. Personi që dyshohet se ndodhej pas timonit të mjetit luksoz “Audi Q8”, është identifikuar nga burime të policisë si Joni Sadikaj, 26 vjeç, i shpallur në kërkim prej muajit janar për një tjetër ngjarje të rëndë kriminale në zonën e Astirit. Ngjarja ndodhi pasditen e së mërkurës, kur mjeti luksoz që drejtohej nga Sadikaj nuk iu bind urdhrave të patrullës së Policisë së Tiranës dhe u përfshi në një ndjekje që përfundoi me përplasjen e tre makinave në një nga akset kryesore të qytetit. Pas aksidentit, Sadikaj u largua në këmbë duke braktisur automjetin, ndërsa bashkëpunëtori i tij, Skerdi Sina, u arrestua në vendngjarje. Të dy personat kanë qenë objekt i një hetimi që lidhet me një episod të rëndë të ndodhur në fillim të këtij viti, ku një vajzë 21-vjeçare u mbajt për orë të tëra e mbyllur në një apartament në zonën e Astirit, nën ndikimin e lëndëve narkotike dhe alkoolit, së bashku me pesë djem të tjerë. Rasti, që mbeti mister për javë me radhë, solli në shpalljen në kërkim të Sadikajt dhe Sinës. Gjatë kontrollit në mjetin e braktisur, policia gjeti një sasi të vogël lënde narkotike të dyshuar kanabis, disa aparate celularë që do t’i nënshtrohen ekspertimit, si dhe sende të tjera me interes hetimor. në momentin e arrestimit, Skerdi Sina kishte në çantë një krehër pistolete të tipit Glock, ndërsa mbante me vete edhe një patentë të falsifikuar me emër tjetër, konkretisht në emër të një shtetasi të quajtur Almo Aliaj, e cila dyshohet të jetë përdorur për të shmangur identifikimin nga autoritetet. Policia konfirmon se dy të rinjtë ishin në vëzhgim pasi dyshohej se po transportonin armë zjarri, ndërsa gjatë ndjekjes, Sina tentoi të largohej në këmbë, duke hedhur armën që më pas u sekuestrua. Ndërkohë, Joni Sadikaj vijon të jetë në kërkim, ndërsa uniformat blu po kryejnë kontrolle intensive për kapjen e tij. Të dy të rinjtë konsiderohen si persona me rrezikshmëri të lartë, për shkak të precedentëve penalë dhe lidhjeve të dyshuara me rrjete kriminale. Hetimet janë në vijim, ndërsa prokuroria ka nisur grumbullimin e provave për akuzat e armëmbajtjes pa leje, rezistencës ndaj punonjësve të policisë, përfshirjes në episode kriminale dhe posedimit të lëndëve narkotike.