Historia e Jonadës së gjymtuar nga RENEA në Berat - (20 Qershor 2004)

Lajme Arkiva - TV Klan 2004 Pas 5 vitesh në dyert e spitaleve dhe gjykatës, ky fëmijë 6-vjeç ka fituar të drejtën e dëmshpërblimit nga shteti, pasi trupi i saj është gjymtuar në nj aksion të dështuar të forcave RENEA. Jonada Dervishi është gjithashtu viktimë e një seriali vrasjesh të ndodhura brenda 24 orëve në Berat në Mars të 1999. Lorenc Polovina dhe dy vëllezër binjakë Fatos e Saimir Ago kishin ekzekutuar njëri pas tjetrit dy shtetas romë në lagjen “Kushtrimi” të Beratit. Pas vrasjes ata largohen nga qyteti në drejtim të Urës Vajgurore, duke ekzekutuar me gjakftohtësi tre policë të postbllokut në hyrje të qytetit. Për t’u larguar nga vendngjarja ata rrëmbejnë makinën e një biznesmeni, duke ekzekutuar dhe këtë të fundit. Pas 6 vrasjeve pa shkak, tre personat strehohen në shtëpinë e Belul Dervishit në fshatin Poshnje dhe brenda pak minutave e shohin veten të rrethuar nga forcat policore të Beratit dhe Fierit, si dhe nga forcat RENEA. Për t’i shpëtuar ekzekutimit, Lorenc Polovina kishte lidhur si antiplumb Jonadën, atëherë vetëm 6 muajshe. Belul Dervishi: “RENEA, ushtarët e RENEA-s ishin këtu gati 10 metro larg, kanë shtënë 20 automatikë njëherësh, e rrëzuan, i ranë nga këmbët, ai fëmijën e zuri nën vete, ata vazhdonin dhe gjuanin akoma, derisa u plagos edhe fëmija im. Bile në momentin që shkoi gruaja ime për të marrë fëmijën, ata vazhdonin dhe gjuanin”. Prej asaj dite Jonada është detyruar t’i nënshtrohet mundimit të jetës si e gjymtuar, ndërsa shëndeti i saj ka mjaft probleme dhe për shkak të plumbave dhe frakturave të marra në vendngjarje. Belul Dervishi: “Shteti premtoi shumë, premtoi ato që duhet të realizonte faktikisht, pasi vetë shteti qe ai që e gjymtoi fëmijën tim. Premtuan aq shumë sa do të bënin një mrekulli për këtë fëmijë, sa kjo s’do dallohej fare nga shoqet e saj dhe tani kjo qeveri s’ka bërë asnjë gjë, as një 10 qindarkë nuk më ka dhënë për shpenzimet që unë vazhdojë në Itali që po e kurojë fëmijën tim. Deri në moshën 20 vjeçe unë jam i detyruar të shkojë dy herë në vit në Itali për t’i ndërruar protezën. Dje isha dhe në komision, mbase përfitoja ndonjë kartë pensioni çupa, ndonjë farë ndihme ekonomike dhe më thanë, që me një këmbë të prerë nuk përfiton asgjë, duhet t’i ketë të dyja këmbët e prera”. Policia dhe shteti nuk morën asnjëherë përsipër për të zbardhur përgjegjësit e ngjarjes ku u qëllua me 20 automatikë mbi një foshnje, e cila po përdorej si peng nga kriminelët. Ndërsa Gjykata e Beratit ka shpallur fajtore Ministrinë e Rendit dhe policinë në një gjyq, nisur pas padisë civile të familjes Dervishi, duke vendosur dëmshpërblim prej 96 milion lekësh të vjetra për këmbën e humbur të Jonadës. Babi i vajzës tregon, se me këto para i duhet të përballojë të paktën trajtimin shëndetësor të së bijës, por Ministria e Rendit është ankuar në Gjykatën e Apelit, duke kërkuar të hedhë poshtë të drejtën e fëmijës për dëmshpërblim./tvklan.al Gazetare: Aranita Brahaj SUBSCRIBE to “RTV KLAN” on YouTube for more videos! Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/