Vəkillər Kollegiyasının nümayəndə heyətinin Naxçıvan səfəri - VİDEOİCMAL

Vəkillər Kollegiyasının nümayəndə heyətinin Naxçıvan səfəri - VİDEOİCMAL 08–09 iyun 2026-cı il tarixlərində Azərbaycan Respublikası Vəkillər Kollegiyasının sədri Anar Bağırovun başçılıq etdiyi nümayəndə heyəti Naxçıvan Muxtar Respublikasında səfərdə olub. Səfər çərçivəsində nümayəndə heyəti Ulu Öndər Heydər Əliyevin Naxçıvan şəhərinin mərkəzi meydanında ucaldılan abidəsini ziyarət edib. Abidə önünə gül dəstələri düzülüb, Ümummilli Liderin əziz xatirəsi dərin ehtiramla yad edilib. Sonra Culfa Rayon Vəkil Bürosunun açılış mərasimi keçirilib, vəkil qurumunun yaradılması ilə vətəndaşların hüquqi yardıma əlçatımlılığının asanlaşdırılması istiqamətində görülən işlər xüsusi ilə vurğulanıb. Səfər proqramına uyğun olaraq Azərbaycan Respublikası Vəkillər Kollegiyası və Azərbaycan Respublikası Mediasiya Şurasının birgə konfransı təşkil edilib, hüquq və mediasiya sahəsində əməkdaşlığın inkişaf perspektivləri müzakirə olunub. Həmçinin Naxçıvan Muxtar Respublikası Vəkillər Kollegiyasının ümumi yığıncağı keçirilərək Kollegiyanın fəaliyyəti və qarşıda duran vəzifələr ətrafında fikir mübadiləsi aparılıb. Səfər çərçivəsində nümayəndə heyəti Naxçıvan Dövlət Universitetində olub, ali təhsil müəssisəsinin rektoru Elbrus İsayev və Hüquq fakültəsinin tələbələri ilə görüş keçirilib. Görüş zamanı vəkillik peşəsinin cəmiyyətdəki rolu, hüququn aliliyinin təmin edilməsində onların funksiyası barədə geniş məlumat verilib. Eyni zamanda Kollegiya tərəfindən ölkədə Hüquq fakültələri fəaliyyət göstərən bütün ali təhsil müəssisələri ilə, o cümlədən Naxçıvan Dövlət Universiteti ilə əməkdaşlıq memorandumu imzalandığı və bu istiqamətdə tələbələrin vəkil qurumlarında təcrübə keçməsi, müxtəlif hüquqi layihələrdə iştirak etməsi üçün geniş imkanlar yaradıldığı diqqətə çatdırılıb. Bundan başqa, Anar Bağırov Hüquq fakültəsinin tələbələri ilə görüşdə peşə təcrübəsini bölüşərək vəkillik institutunun keçdiyi inkişaf yolu, son dövrlər bu sahədə aparılan islahatlar, əhalinin keyfiyyətli hüquqi yardıma çıxış imkanlarının genişləndirilməsi, regionlarda vəkillik xidmətlərinin əlçatanlığının artırılması və gənc hüquqşünasların peşəyə cəlb olunması istiqamətində görülən işlər barədə ətraflı danışıb.