Mbyllet procesi Hajdari, Jaho Mulosmani denohet me burgim te perjetshem - (29 Prill 2002)

Lajme Arkiva - TV Klan 2002 Vrasja e deputetit të PD Azem Hajdari është kryer për motive hakmarrje dhe jo për motive politike. Ky është konkluzioni i gjykatës së Tiranës, ku prej më shumë se një viti u shqyrtua dosja për të ashtuquajturën vrasja e shekullit. Tashmë jo për akuzën e vrasjes, për shkak të cilësive të veçanta, por me atë të vrasjes me paramendim për hakmarrje, gjyqtari Arben Micko vendosi burgimin e përjetshëm për Jaho Mulosmanin, si ekzekutor dhe organizator i atentatit të 12 Shtatorit 1998. Prokurorët sipas gjyqtarit, nuk vërtetuan me prova dhe dëshmitarët që paraqitën akuzën e bashkëpunimit në vrasje për Fatmir Metën dhe Isamedin Haxhinë. Ata u shpallën të pafajshëm për vrasjen, ndërsa Isamedini është dënuar me dy vjet e gjashtë muaj burg për armëmbajtje pa leje. Ish-i pandehuri Meta u lirua në sallën e gjyqit, ndërsa Isamedin Haxhia është njohur me vendimin në qelinë e burgut 313, sepse bashkë me vëllain e tij Ismet Haxhinë, refuzuan të merrnin pjesë në seancën e fundit të këtij procesi. Izet Haxhia ish-truproja i kryetarit të PD Sali Berisha, ka qenë mbështetja kryesore për atentatorët. Fakti që ai gëzonte besimin e kësaj partie dhe të vetë Azem Hajdarit, përbën një provë të pakundërshtueshme për togat e zeza, se pa ndihmën e Izet Haxhisë, ekzekutimi i Azem Hajdarit do të ishte shumë i vështirë. Ismet Haxhia u dënua me 20 vjet heqje lirie, sepse gjykata çmojë se prova dhe dëshmitarët vërtetuan se ai ka qenë në vendin e ngjarjes natën e 12 Shtatorit 98, si dhe është takuar me organizatorët e atentatit. Dëshmitë e Astrit Muldakës, marrë përmes videokonferencës dhe të Petrit Çakrrit, nuk kanë qenë bindëse për gjykatën. Kjo e fundit shprehu rezerva për besueshmërinë e dy dëshmitarëve. Në vendimin e togave të zeza Astrit Muldaka u cilësua si i pandehur për të njëjtën çështje. Seanca e fundit e dosjes Hajdari, u shoqërua nga masa ekstreme sigurie, gjatë kohës së zhvillimit të saj. Megjithatë asnjë reagim nuk pati nga i dënuari me burgim të përjetshëm Jaho Mulosmani. Ai është i vetmi i pandehur i dosjes, i cili gjatë gjithë procesit gjyqësor nuk ka pasur të pranishëm në sallën ku gjykohej ndonjë familjar ose të afërm. E papritura e vendimit të gjykatës së Tiranës për çështjen Hajdari ka qenë rrëzimi i pretendimit të prokurorisë, se vrasja është kryer për motive politike. Kryetari i PD Berisha, ishte i pari që e akuzoi qeverinë e atëhershme për organizimin e vrasjes edhe pse ai nuk pranoi asnjëherë të dëshmonte në gjykatë për çështjen./tvklan.al SUBSCRIBE to “RTV KLAN” on YouTube for more videos! Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/