പെരുവനം | യോഗാതിരി | yogathiri | ടി. ആർ. വേണുഗോപാലൻ | Prof. T.R Venugopalan | Vinod Kandemkavil

പത്തൊൻപതാം നൂറ്റാണ്ടിനു മുൻപ് കേരളത്തിലെ ഗ്രാമക്ഷേത്രസങ്കേതങ്ങളുടെ കീഴിൽ അളവറ്റ സമ്പത്ത് ഉണ്ടായിരുന്നു. പെരുവനം ഗ്രാമത്തിനകത്ത് തന്നെ 18 ചേരിക്കലുകളിലായി ലക്ഷം പറ നെല്ല് പാട്ടം ലഭിച്ചിരുന്നതായി ഗ്രന്ഥവരിയിൽ പരാമർശമുണ്ട്. ആ സമ്പത്ത് കൈകാര്യം ചെയ്യുന്നതിനായി "യോഗം" എന്ന പേരിൽ നമ്പൂതിരിമാരുടെ ഒരു ഉന്നതാധികാര സമിതി ഉണ്ടായിരുന്നു; ആ യോഗത്തിന്റെ തലവനായിരുന്നു യോഗാതിരി (യോഗാതിരിപ്പാട്). ഒരേ സമയം ആത്മീയാചാര്യനും ഭരണാധികാരിയും ആയിരുന്നു യോഗാതിരി. തൃശ്ശൂരിൽ പെരുവനം, വടക്കുംനാഥൻ എന്നീ ക്ഷേത്രങ്ങൾ യോഗാതിരി ഭരണത്തിന് കീഴിൽ ആയിരുന്നു. അഷ്ടഗൃഹത്തിൽ ആഢ്യന്മാർ എന്ന് അറിയപ്പെടുന്ന കാളകണ്ഠം, മേഴത്തോള്‍, മാത്തൂര്‍, കുലക്കല്ലൂര്‍, ചെമ്മങ്ങാട്‌, പാഴൂര്‍, മുരിങ്ങോട്ടില്‍, വെള്ളാങ്കല്ലൂര്‍ എന്നീ എട്ട് ഇല്ലക്കാരിൽ നിന്നായിരുന്നു യോഗാതിരിയെ തിരഞ്ഞെടുത്തിരുന്നത്. ഇവർ നാടുവാഴിമാരേക്കാളും അധികാരമുള്ളവർ ആയിരുന്നു. പതിനൊന്നാം നൂറ്റാണ്ടു മുതൽക്കേ യോഗാതിരി ഭരണം നിലനിന്നിരുന്നതായി രേഖകളിൽ പറയുന്നു. ഓരോ പുതിയ യോഗാതിരിയേയും വാഴിക്കുന്ന ചടങ്ങായ യോഗാതിരി അവരോധത്തെയും പറ്റി ഗ്രന്ഥവരിയിൽ പരാമർശിക്കുന്നുണ്ട്. പെരുവനത്തെയും, വടക്കുനാഥനിലേയും യോഗാതിരി വാഴ്ച്ചയുടെ അപ്രമാദിത്തം, യോഗാതിരി അവരോധം, പ്രസക്തി, അധികാരം, യോഗാതിരിയുടെ രാഷ്ട്രീയ ഇടപെടൽ എന്നിവയെ സംബന്ധിച്ച് പ്രൊഫ. ടി. ആർ. വേണുഗോപാലൻ സംസാരിക്കുന്നു. #peruvanam #yogathiri #trvenugopalan