ការដាក់ឱ្យអនុវត្តជាផ្លូវការ HMIS-DHIS2 ជាការធ្វើបរិវត្តកម្មសុខាភិបាលឌីជីថល

ការដាក់ឱ្យអនុវត្តជាផ្លូវការ ប្រព័ន្ធគ្រប់គ្រងព័ត៌មានសុខាភិបាល-ថ្នាលទិន្នន័យ DHIS2 ជាការធ្វើបរិវត្តកម្មសុខាភិបាលឌីជីថល ប្រព័ន្ធ DHIS2 ដែលមានមុខងារ និងសមត្ថភាពខ្ពស់ក្នុងការប្រមូល គ្រប់គ្រង វិភាគ និងបង្ហាញទិន្នន័យស្ថិតិសុខាភិបាល និងការតាមដានករណី។ ការប្រើប្រាស់ទិន្នន័យទាំងនេះ សម្រាប់គាំទ្រដល់ការសម្រេចចិត្តគ្លីនិក ការអង្កេតតាមដាន ឆ្លើយតបជំងឺ អន្តរាគមន៍នៃកម្មវិធីសុខភាពសាធារណៈ ការរៀបចំផែនការ ការអភិវឌ្ឍគោលនយោបាយ យុទ្ធសាស្ត្រ ការតាមដាន និងការវាយតម្លៃសមិទ្ធកម្មនៃប្រព័ន្ធសុខាភិបាល។ ក្រសួងសុខាភិបាលកម្ពុជា កំពុងពន្លឿនក្នុងការធ្វើកំណែទម្រង់ប្រព័ន្ធសុខាភិបាលឌីជីថល ដើម្បីជួយពង្រឹងអភិបាលកិច្ច បង្កើនសមត្ថភាពភ្ជាប់ទិន្នន័យសុខាភិបាល ពង្រឹងអធិបតេយ្យភាពលើប្រព័ន្ធព័ត៌មាន និងគាំទ្រការសម្រេចចិត្តផ្អែកលើទិន្នន័យ ដើម្បីបម្រើសេវាសុខាភិបាលប្រកបដោយប្រសិទ្ធភាព តម្លាភាព និងគុណភាពកាន់តែប្រសើរ។