PR Lú Olo Simu Vasina Primeira Dose

“Ha’u husu ba komunidade sira hotu, ba populasaun sira tomak, Ita-nia vasina agora iha. Hotu-hotu bele dispoen nia-an para atu ba iha sentru sira ne’ebe maka fó vasina ne’e, hotu-hotu simu vasina, para nune’e ita bele livre atu bele halo ita-nia vida lorloron nian”. Prezidente Repúblika Francisco Guterres Lú Olo, hato’o ida ne’e bainhira hamutuk ho nia Espoza, Cidália Nobre Guterres no funsionáriu sira Prezidénsia Repúblika nian, simu vasina AstraZeneca, doze dahuluk, husi pesoál saúde Ospital Nasionál Guido Valadares, iha Salaun Serimónia Ofisiál Palásiu Nicolau Lobato. “Se ida ne’e (simu vasina) ita la halo, bainhira mak ita bele livre? Ita kontinua nafatin de’it ho situasaun ida hanesan ne’e, ita nunka mais livre para ita atu bele halo ita-nia servisu”, hatutan Xefe Estadu, Francisco Guterres Lú Olo, iha atividade ne’ebé hala’o ho prezensa Vise Ministru Saúde, Bonifácio Maukoli dos Reis, reprezentante Sentru Integradu Jestaun Krize (CIGC_sigla português) no Sala Situasaun, dra. Odete da Silva Viegas. “Ne’e duni ha’u husu ba komunidade hotu-hotu, ita hotu koopera, ita hotu simu vasina ba, para atu bele proteje ita-nia an, ita-nia familia, ita-nia komunidade tomak”, apela Prezidente Francisco Guterres Lú Olo, ne’ebé iha okaziaun ne’e hato’o razaun ne’ebé lori nia la simu vasina AstraZeneca doze dahuluk, iha serimonia lansamentu vasina ne’e. “Foufoun, ha’u hanoin vasina kuandu to’o mai, ministru sira, sira Sentru Integradu Jestaun-de- Krizi nian, hanesan mós Señor Primeiru Ministru rasik, hakarak tebes Prezidente atu vasina iha altura ida ne’eba, maibé ha’u hateten ba sira, ha’u dehan katak lae, tenki fó uluk lai ba ita-nia maluk sira iha frontline (liña oin) ho ita-nia komunidade sira uluk tiha lai, depois Prezidente-da-Republika bele ikus laiha problema ida. Purke moras sira ne’e hotu, se mak vulneravel liu, ita-nia maluk sira ne’ebé iha (liña) oin. Portantu, fó prioridade ba sira. Pur outru ladu mós, prontu, hein mós hanesan husi hau-nia médiku rasik ninia rekomendasaun para atu bele simu vasina iha nia tempu rasik. Tanba ne’e maka iha primeira oportunidade seidauk simu”. “Ohin, ha’u mai hamutuk ho funsionáriu sira, ho Ita-Boot sira, para atu simu vasina ida ne’e hanesan parte husi Prezidénsia-da-Republika nian hodi koopera ho Estadu tomak i atu bele halo mós prevensaun pesoalmente ba hau-nia saúde i hanesan mós ba saúde familia nian i ba komunidade nian, purke Prezidente Repúblika kontaktu ho ema barak. I tanba ne’e duni maka, ohin, ha’u mai para hamutuk ho imi hotu, ita simu vasina ida ne’e”.