Íbúð 10B í Þjóðleikhúsinu. Viðtal við leikstjórann, Baltasar Kormák.

https://leikhusid.is/syningar/ibud-10b/ Ögrandi og meinfyndið verk beint úr íslenskum samtíma Einn eigenda glæsilegs fjölbýlishúss í Reykjavík hefur ákveðið að breyta lúxusíbúð sinni í gistiheimili fyrir tuttugu arabíska hælisleitendur. Aðrir íbúar í húsinu eru mjög hlynntir fjölbreytileika en sætta sig ekki við að reglur húsfélagsins séu fótumtroðnar. Nú reynir á yfirvegun og samstöðu. Og hvar liggja mörk góðmennskunnar? Marta og Heiðar bjóða nágrönnum sínum heim til að ræða málin yfir góðum ostum og víni. Undir kurteislegu yfirborðinu tekur brátt að glitta í lögmál frumskógarins og notaleg kvöldstund snýst upp í harðvítug átök þar sem villidýrseðlið brýst fram. Við viljum vera góð – en hversu langt erum við tilbúin að ganga? „Mér finnst í sjálfu sér ekki stór munur á leikhúsi og bíó. Þetta er bara frásagnarmiðill en tækin eru öðruvísi. Þú ert að reyna að tengja áhorfandann, þú ert að reyna að spegla hann, vekja hann til umhugsunar, skemmta honum, jafnvel að græta hann. Og helst að láta hann líta aðeins inn á við og skoða eigið líf.“