Христос Воскресе!

Песната „Христос Воскреснува“, проследена со видео запис, несомнено претставува своевидно освежување на домашната уметничка и теолошка сцена, освежување кое е накалемено на нашето богато православно предание, и, истото тоа предание го актуелизира на начин разбирлив за современиот човек. Оваа впечатлива песна ја пеат повеќемина дечиња, кои секоја недела се собираат и се причестуваат на литургиите, кои се служат во Манастирот „Успение на Пресвета Богородица“ (МПЦ-ОА), с. Маркова Сушица, покрај Скопје. Жизнерадосната и торжествена композиција е на Маја Стојановиќ Крстиќ (магистер пијанист по класична музика), а теолошки издржаниот текст е на м-р Дарко Крстиќ (психолог), внук на нашиот познат писател од Охрид, Анѓелко Крстиќ. Идејата за оваа песна произлегла сосема спонтано, во инспиративните и долги разговори во манастирската гостопримница после отслужените литургии, кога и биле согледани потенцијалот, и пред сѐ радоста, кои во меѓусебната комуникација ги споделуваат најмладите припадници, кои, како што предочивме, литургиски заедничарат во гореспоменатиот манастир. Музиката, текстот и детската интерпретација сведочат за вечната радост, која произлегува од Воскресението Христово и ја испраќаат пораката за потребата од духовно воздигнување и теолошка писменост, потребата од отфрлање на површните и бесплодни обичаи на фолклорното Христијанство, како и потребата од остварување на максимата на православниот духовен живот, а тоа бездруго е обожението, проникнувањето со несоздадената божествена светлина. Оваа песна е повик за учество во небоземната радост, повик за надеж и духовна преобразба, која води кон, како што посочивме, клучниот термин на православната вера - обожението. Младите и нежни детски срца со песната „Христос Воскреснува“ даваат еден од одговорите за значењето на празникот Воскресение Христово. Тие пеат за светлата иднина на животот во Христа, живот кој е целовит, а не растурен, живот кој е спасоносен и вечен. Христос Воскресна!