"ҒҰМЫР" ТОБЫНЫҢ "ҚҰШАҚТА" АТТЫ ШЫҒАРМАШЫЛЫҚ КЕШІ. ҮРЖАР АУДАНЫ. 2025 ЖЫЛ

"ҒҰМЫРДЫҢ" ДҮБІРЛІ ӘН КЕШІ 27 ақпан күні Үржар аудандық мәдениет үйінде "Ғұмыр" тобының "Құшақта" атты шығармашылық кеші өте жоғары деңгейде өтті. Концерттік бағдарламаның шымылдығы Ж.Бейсеновтің әйгілі "Ауылым" әнімен ашылды. "Ғұмыр" тобы әрдайым Үржар өңірінің композиторлары мен ақындарының әндерін насихаттап жүреді. Ән кешінде Қанат Сатмұхамбетов, Дарын Шаяхметов, Нұрбол Черубаев, Әліби Қаниев, Серікбек Туғанов, Баян Бағдатұлы, Бегембай Аққалақовтың әндері шырқалды. Концертте Архат Мағауияновтың "Құшақта", Еркін Қалиевтің "Ей, өмір" әндерінің тұсаукесері болды. Көрермен қауым "Алаш ұлдары", "Бабалар рухы", "Үржарым аманат" патриоттық әндерімен рухтанып, отбасылық құндылықтарды дәріптеген "Ана", "Жан әке", "Әке мен бала", "Ұлпа сезім" әндерін сүйсіне тыңдады. Концерттің үшінші бөлімінде жігіттер "Қазақ тойы", "Іңкәр сезім ", "80 жылдың әндерінен попурри", "Махаббат заңы" атты заманауи ырғақты әндерімен ортаны жандырды. Халықпен бірлесе Шәмші әндерін шырқаса, Е Хасанғалиевтің "Атамекен" әні кештің нүктесін қойды. Шығармашылық кешке арнайы Алматы, Семей, Аягөз қалаларынан Берік Серғазиев, Ануар Оразғалиев, Талант Өнербекұлы, Индира Ықыласова сынде өнердегі әріптестері келіп әннен шашу шашты. Ауданның арқалы асабалары Ермек Қарымсақов пен Мерғалым Тұрсынбеков әдемі әзілмен кешті өте көңілді өткізді. Үржар ауданы әкімінің орынбасары Әсет Баймұрзаев "Ғұмыр" тобының әншілерін құттықтап, аудан әкімі Ақылбек Башимбаевтың марапатын тапсырды. Кеш иелерін "Аманат" партиясының Үржар аудандық филиалының атқарушы хатшысы Е.Бейсенов, Мақаншы аудандық мәдениет үйінің директоры А.Рахимов, Жоғары Егінсу ауылдық округінің әкімі А.Байгұлжин, Егінсу ауылдық округінің әкімі Ж.Сағымбаев, Науалы ауылдық округінің әкімі Р.Искаков, ұстазы М.Кебиспаева құттықтап, сый-сияпаттарын табыс етті. Өнерпаз жігіттердің аналары мен жақындары ақ тілектерін ақтарып, ақсақалдар бата берді. Топ құрамындағы ауданның белгілі өнерпаздары Архат Мағауиянов, Сұңқар Ықыласов, Еркін Қалиевтің өнерін тамашалауға келген зал толы халық риза болып тарқасты. Халыққа сапалы концерт қойып, рухани ләззат сыйлаған шығармашылық ұжымға үлкен алғысымызды білдіреміз.