Игілік Омаров. Арқа әнінің бәйтерегіне 90 жыл.

Есімі өміршең тума таланттың туғанына, міне, биыл 90 жыл толып отыр. «Ақерке», «Тау ішінде», «Сен сұлу», «Әлі есімде», «Қанатталды», «Жамбас сипар», «Адасқақ», «Жайлаукөл кештері», «Арқа аруы», « Ауылым» сынды әндерімен тыңдарман жүрегін жаулаған талант иесінің есімі ел есінен бір сәтке шыққан емес. «Жақсының аты өлмейді» демекші, өнегелі өмірін еліне арнап, халқына адал перзент бола білген И.Омаровтың есімі ел есінен өшпек емес. Көзі тірісінде шәкірттеріне үйреткен Ақан сері, Үкілі Ыбырай, Біржан сал сынды халық сазгерлерінің тамаша туындылары мен небір әсем әндер халық жадында жаңғырып, жалғасын табуда. Осы тұрғыда атамның музыкалық мұрасын күллі қазақ еліне кеңінен насихаттап, оның ізінен ерген талантты шәкірттеріне, барша дәстүрлі ән мектебі өкілдеріне айрықша алғыс айтқым келеді. Әсем әуезді әншінің қаншама жүректерді тебірентіп, талайлардың таңдайын қақтырған қоңыр дауысы қазақтың кең даласын әлі де әлдилеп тұрғандай…