Садык Шер-Нияз: Жапаров оппоненттерине жалаа жабуудан алыс болушу керек

«Президенттикке талапкерлер абайлап сүйлөп, ар бир билдирүүбүздө биз акыйкатты, чындыкты калыс айтып турушубуз керек». Бул тууралуу президенттикке талапкер Садык Шер-Нияз бүгүн, 24-ноябрда талапкерлердин басма сөз жыйынында билдирди. Ал Садыр Жапаровдун 23-ноябрда 7-каналдагы маегинде чындыкка дал келбеген сөздөр айтылганын белгиледи. Президенттикке талапкер Садыр Жапаровдун 23-ноябрда 7-каналдагы маегинде айткан сөздөрүнө карата, бүгүн, 24-ноябрда айрым президенттикке талапкерлер жооп иретинде басма сөз жыйынын өткөрүштү. Алар Садыр Жапаровдун сөздөрүндө талапкерлерге айыптоо, жалаа жабуу аракеттери байкалганын белгилешти. Өкмөт башчылык кызматын убактылуу токтоткон Садыр Жапаров сунушталып жаткан Баш мыйзамдын долбоору боюнча 23-ноябрда «7-канал» сыналгы каналына кенен маек куруп, долбоорду сындап жаткандарга жооп берди. Жапаров 2010-жылы 27-июнда кабыл алынган Баш мыйзам бир адамдын кызыкчылыгында гана жазылган деп кескин сындады.