Abzas Media – 10 il: bir abzasdan başlayan yol

6 əməkdaşı həbsdə olan, fəaliyyətini isə mühacirətdə davam etdirən “Abzas Media” bu gün 10 yaşını qeyd edir. Korrupsiya araşdırmaları ilə tanınan media qurumunu 2016-cı ildə bir qrup gənc təsis edib. Bu illər ərzində “Abzas Media”nın əməkdaşları peşə fəaliyyətlərini yerinə yetirdiklərinə görə dəfələrlə təqib və təzyiqlərlə üzləşiblər. Jurnalistlərin çəkilişlərinə müdaxilə edilib, onlar qanunsuz olaraq polis idarələrinə aparılıb, peşə fəaliyyətlərinə görə fiziki və psixoloji zorakılığa məruz qalıblar. Hökumət media qurumuna və onun əməkdaşlarına qarşı sistemli basqı siyasəti həyata keçirib. 2023-cü ilin noyabrından başlayaraq “Abzas Media”nın 6 əməkdaşı həbs edilib. 2025-ci ilin iyununda məhkəmə Ülvi Həsənli, Sevinc Vaqifqızı, Hafiz Babalı və bu iş üzrə sonradan həbs edilən “Azadlıq Radiosu”nun əməkdaşı Fərid Mehralızadəni 9 il, Nərgiz Absalamova və Elnarə Qasımovanı 8 il, Məhəmməd Kekalovu isə 7 il 6 ay müddətinə azadlıqdan məhrum edib. Jurnalistlər ittihamları rədd edir, həbslərinin “Abzas Media”nın korrupsiya araşdırmaları ilə bağlı olduğunu bildirirlər.