Bro Myrddin yn ymweld a rhif 10 Stryd Downing @yggbm VISIT DOWNING STREET

Bro Myrddin yn ymweld a rhif 10 Stryd Downing ar Ddydd Gwyl Dewi Ysgol Bro Myrddin's Choir visit 10 Downing Street on St David's Day 2012 Anrhydedd mawr a ddaeth i ran y côr hŷn yr wythnos hon gyda gwahoddiad i fod yn rhan o ddathliadau Gŵyl Ddewi rhif 10 Stryd Downing ar y 29ain o Chwefror. Cyrhaeddodd yr un ar hugain o ddisgyblion gyda'i harweinydd Mrs Meinir Richards a dirprwy yr ysgol Dr Llinos Jones tu-allan i Stryd Downing am 4.00 o'r gloch y prynhawn. Ar ôl cael eu tywys i'r tŷ gan yr heddlu croesawyd y criw gan staff y prif weinidog. Tywyswyd pawb i'r ystafell drafod enfawr lle cafodd pawb gyfle i baratoi. Wrth i'r cant a hanner o westeion gyrraedd y derbyniad Cymreig roedd côr yr ysgol yn canu yn y cefndir. Braf oedd cael clywed y côr yn canu 'Finlandia', pedwarawd yn canu 'Alaw Mair' a'r ddeuawd 'Bara Angylion Duw.' Yn dilyn anerchiad pwrpasol gan y prif weinidog, David Cameron, croesawyd y côr unwaith eto i ganu'r gân hynod berthnasol, Eryr Pengwern. Cafwyd cyfle wedyn i gael sgwrs gyda'r prif weinidog a llu o westeion eraill. Braf oedd cael torri gair gydag enwogion megis Ieuan Wyn Jones, Karl Jenkins, Tim Rhys-Evans a llu o aelodau seneddol Cymreig. Uchafbwynt y dydd i'r côr yn sicr oedd cael sgwrs a llun gyda Sam Warburton a Warren Gatland. Cafwyd cyfle hefyd i gael llun answyddogol a sgwrs hir gyda chymeriadau Gavin a Stacey ac Emmerdale. Dilynwyd hyn gan lond côl o 'canapes' blasus a phleser wedyn oedd cael cwrdd gyda'r cogyddion a oedd hefyd o Gymru. Cafodd pawb gyfle wedyn i grwydro'r ystafelloedd a bu llu o bobl yn llongyfarch y disgyblion ar eu perfformiad clodwiw. Yn sicr, fe lwyddwyd drwy'r cyflwyniad i godi proffil y Cymry ac Ysgol Gyfun Gymraeg Bro Myrddin.