宏福苑聽證．第 25 日｜女兒、丈夫葬火海　宏泰閣居民哭訴四分鐘

全文：https://tinyurl.com/4xjx7pbc 宏福苑聽證會踏入第 25 日，今早在委員會大狀杜淦堃引述專家調查結論時，一直有居民在旁飲泣。 聽證會早上結束後，宏泰閣居民吳女士離開時接受傳媒採訪淚崩。對於聽證會「不升格」，她批評聽證會沒有法律效力、未能幫助災民，痛哭指居民不是「以災亂港」，家中理應是安全的地方，但居民卻「無端端冇咗條命」，全因政府監管不力。她說很多政府部門承認不理想，「唔理想即係有錯啦。你哋出嚟認錯吖嘛，香港冇死刑㗎，你哋認錯俾死者一個安息，生者一個安心」，質疑「你哋咁樣搞法，人哋點樣生活落去呀？」。 吳女士說，剛大學畢業的女兒以及丈夫不幸於大火中離世，她表示「我好辛苦養大佢㗎你知唔知呀，我唔想再講，我呢半年來已經就來精神崩潰」，要到精神科就醫和向心理醫生求助。她強調希望政府能還 168 條無辜離世的人命一個公道，痛批「人為疏忽、就是一個貪字，搞到佢哋冇咗條命」。 她又說「屋冇咗可以再買過或者申請政府樓，人生冇咗條命就冇㗎喇，知唔知每日見到你哋咁多條生命喺度，我好羨慕你哋有生命可以生存喺呢個世上啊」，對自己獨活、女兒和丈夫離世感悲痛。她最後重申聽證會沒有法律效力，認為「俾唔到我哋一個結果，犯咗法嗰啲人又冇出庭」，認為聽證會尋找原因的目標，是要給予宏福苑居民交代，而非拖延時間。她說「拖落去，即係迫死我哋啲災民啫」。家人離世，吳女士說心理仍有很大陰影，「日日都受到嗰啲情緒起起落落，好難受，我哋唔想喊㗎，唔知點解啲眼淚自己滴落嚟」，需人攙扶離開。