Natiq Cəfərli ilə Əhəd Məmmədlinin davalı debatı! Müxalifətin "sualtı qayıq" taktikası... -CANLI

REAL müxalifətə “sualtı qayıq” taktikası təklif edib. REAL funksioneri Natiq Cəfərli müxalifətə yeni mübarizə taktikası təklif edib. N.Cəfərli öncə tarixə ekskurs edərək yazıb ki, 22 sentyabr 1914-ci ildə Almaniyanın sualtı qayığı qəflətən, gözlənilmədən Britaniya sularında peyda olur və o zaman güclü hərbi dəniz donanmasına sahib Britaniyanın 3 zirehli kreyserini cəmi 1 saat 15 dəqiqəyə batırır: “1500 britaniyalı həlak olur, Böyük Britaniya şok yaşayır. Sonra uzun zaman bu əməliyyat müzakirə olunur, haqqında araşdırmalar aparılır, İkinci Dünya savaşında da bu taktikaya əl atılır. Rəqibi hazırlıqsız yaxalamaq, heç kəsin gözləmədiyi məqamda və məkanda üzə çıxmaq taktikasından söhbət gedir”. Sitatın sonu. N. Cəfərli iddia edir ki, “siyasətdə müntəzəm şəkildə sualtı qayıq taktikasından istifadə etmək mümkündür”. Daha bir sitat: “Ölkəmizin siyasi səhnəsi çox qarışıb, müxaliflik pafosa və ancaq bəlli simvolizmlərlə mübarizəyə dönüb. Halbuki müxaliflik tək mövcud vəziyyətin təhlili və tənqidi deyil, həm də vəziyyətin dəyişməsi reseptinin təklifi və müzakirəsidir. Xalqımızın böyük bir hissəsinin siyasətdən kənarda qalmasının müxtəlif səbəbləri var, amma bunu tək hakimiyyətin basqıları, hədə-qorxuları ilə izah etmək doğru deyil. Əsas məqamlardan biri heç bir inandırıcı resept olmadan “bunlar pisdir, biz gəlsək, yaxşı olacaq” yanaşmasıdır. İndi ölkədə siyasi həyat durğunluq nöqtəsindədir, heç bir proses (seçki, referendum və s.) yoxdur, ağıllı siyasi partiyalar, təşkilatlar növbəti siyasi dalğalara, seçkilərə, yeni siyasi çağırışlara hazırlaşmalı, obrazlı ifadə etsək, sualtı qayıq kimi bəzən gözə görünmədən, dərinliklərə enərək öz işlərini keyfiyyətlə, ardıcıl görməlidir ki, zamanı yetişəndə, siyasi proseslər başlayanda heç kimin gözləmədiyi yerdə üzə çıxıb öz hədəflərinə çatsınlar. Siyasət budur, siyasi taktika və strategiya belə qurulur, 30 ildir həm hakimiyyət, həm də bəzi müxalif qüvvələr siyasəti bəsitləşdirib hay-küyə çeviriblər. Xalq da bunu görür, bilir, hiss edir, ona görə də siyasi proseslərdən uzaq durmağa çalışır…”. Bu təklif onsuz da gərgin olan müxalifət daxili münasibətlərə yeni rəng qatıb. Azərbaycan müxalifəti bu taktikadan istifadə etməlidirmi? Etsə, nə olar? ReAL partiyası öz cəbhədaşlarına məsləhət verəcək, yol göstərəcək qədər geniş təcrübəyə malikdirmi? Bu sualların fonunda və paralel ölkə gündəmi ilə bağlı məqamları "Canlı debat" verilişində müzakirə edirik. ReAL Partiyasının icra katibi Natiq Cəfərli və Ağ Partiya sədrinin birinci müavini Əhəd Məmmədli bu mövzularla bağlı müzakirə edirik. Müzakirədə tamaşaçılarımız da iştirak edə bilərlər.