ടെറസിൽ നാമ്പിട്ടു,​​ ബോൺസായി ഉദ്യാനം | Bonsai Garden | Kollam

കൊല്ലം: വഴിയരികിൽ നിന്ന് ലഭിക്കുന്ന മരത്തൈകൾകൊണ്ട് ടെറസിൽ ബോൺസായി ഉദ്യാനം ഒരുക്കിയിരിക്കുകയാണ് കൊല്ലം കരുനാഗപ്പള്ളി കല്ലുകടവ് മിലൻ വിഹാറിൽ നവീൻ പ്രസാദ്. എട്ടാം ക്‌ളാസിൽ പഠിക്കുമ്പോഴാണ് ബോൺസായ് മരങ്ങളെക്കുറിച്ച് വായിക്കുന്നത്. കൗതുകത്തിന് മതിലിൽ പറ്റിപ്പിടിച്ച് വളർന്ന ആൽമരത്തൈ പിഴുത് ചെടിച്ചട്ടിയിൽ വളർത്തി. പിന്നീടത് ശീലമായി. കേരള ഗ്രാമീൺ ബാങ്ക് കരുനാഗപ്പള്ളി ശാഖയിലെ കളക്ഷൻ ഏജന്റായ നവീൻ ജോലിയുടെ ഭാഗമായി പോകുന്ന വഴികളിൽ നിന്നെല്ലാം മരത്തൈകൾ ശേഖരിക്കും. ചെടിയുടെ തായ് വേര് ഒഴിവാക്കി നാരുവേരുകൾ മാത്രം നിറുത്തിയാണ് വലിയ മരങ്ങളുടെ ചെറുപതിപ്പുകൾ ഒരുക്കുന്നത്. ആൽ, തെങ്ങ്,​ കണിക്കൊന്ന,​ പുളിമരം,​ മാവ്,​ അത്തിമരം,​ വാകമരം,​ വെട്ടിമരം, ചാമ്പ, മുള, ഞാവൽ, ഞാറ,​ അക്വേഷ്യ, മാഞ്ചിയം, ഫൈകസ്, സുരിനാം ചെറി, രക്തചന്ദനം തുടങ്ങി നിരവധി വൃക്ഷങ്ങളുടെ ചെറു പതിപ്പുകൾ നവീന്റെ ഉദ്യാനത്തിലുണ്ട്. എല്ലാത്തിനും 20 വർഷത്തിലധികം പഴക്കമുണ്ട്. വില ലക്ഷങ്ങൾ ബോൺസായ് മരത്തിന്റെ പഴക്കവും ഭംഗിയും കണക്കാക്കിയാണ് വില നിശ്ചയിക്കുന്നത്. വിപണിയലിൽ പതിനായിരങ്ങൾ മുതൽ ലക്ഷങ്ങൾ വരെ വില ലഭിക്കും. എന്നാൽ മരങ്ങൾ വിൽക്കാൻ നവീന് ഉദ്ദേശമില്ല. ബോൺസായ് മരങ്ങളെപ്പറ്റി മനസിലാക്കാനും ഭംഗി ആസ്വദിക്കുന്നതിനുമായി 'കോഫീ വിത്ത് ബോൺസായ് ' എന്ന പേരിൽ സംരംഭം തുടങ്ങാനുള്ള തയ്യാറെടുപ്പിലാണ്. ഭാര്യ ആർദ്ര.ജി.രമണനും മറ്റ് ബന്ധുക്കളും പിന്തുണയുമായി ഒപ്പമുണ്ട്. ബോൺസായി ചെടിവളർത്തൽ ഒരു കലയാണ്. മരങ്ങളെ ജീവിക്കുന്ന ശില്പങ്ങളാക്കി വളർത്തി പരിപാലിക്കാൻ ക്ഷമയും കലാബോധവും ആവശ്യമാണ്. #bonsai #bonsaitree #bonsaigarden