Mapya! NENDENI MAHAKAMANI KATAMBI AWARUHUSU WANAODAI KATAMBI AVUNJA UKIMYA

Waziri wa Mambo ya Ndani ya Nchi, Patrobas Katambi, amesema hakuna mtu, taasisi au kiongozi mwenye mamlaka ya kikatiba ya kutoa hukumu kwamba Katiba imevunjwa isipokuwa Mahakama, akisisitiza kuwa mamlaka hayo yametolewa wazi na Katiba ya Jamhuri ya Muungano wa Tanzania ya mwaka 1977. Akizungumza kuhusu mjadala unaoendelea kuhusu haki za kikatiba, Katambi alisema wananchi wanapaswa kujiepusha na kujipa mamlaka ya kimahakama kwa kutamka kuwa mtu au taasisi fulani imevunja Katiba kabla ya Mahakama kutoa uamuzi. Alifafanua kuwa endapo mtu anaamini haki yake ya kikatiba imevunjwa au iko katika hatari ya kuvunjwa, Katiba kupitia Ibara ya 30 inampa haki ya kufungua shauri katika Mahakama Kuu ili ipate kutoa uamuzi wa kisheria. Katambi alisema pamoja na kwamba Katiba inalinda haki ya kukusanyika, kuandamana na kushirikiana na wengine kama ilivyoainishwa katika Ibara ya 20, haki hizo si za moja kwa moja bila mipaka, bali zinapaswa kutekelezwa kwa kuzingatia sheria zilizowekwa na Bunge kwa ajili ya kulinda maslahi ya umma, usalama wa taifa, amani, afya ya jamii pamoja na uhuru na haki za watu wengine. "Wapo wanaowafundisha Watanzania kwamba kuna haki ambazo hazina wajibu wala masharti. Hi poolyo si sahihi. Kila haki ina wajibu wake na utekelezaji wake lazima uzingatie sheria ili kulinda haki za wengine," alisema Katambi. Aliongeza kuwa tafsiri sahihi ya Katiba haiwezi kufanywa kwa kusoma kifungu kimoja pekee, kwani vifungu vya Katiba vinahusiana na sheria nyingine za nchi pamoja na mikataba ya kimataifa, hivyo vinahitaji uelewa mpana wa mfumo mzima wa sheria. Kwa mujibu wa Waziri huyo, Serikali itaendelea kutoa elimu ya kisheria ili wananchi waelewe kuwa haki za kikatiba zinakwenda sambamba na wajibu wa kuheshimu sheria na kulinda amani pamoja na utulivu wa nchi. #news