Kara: Protestat në rrugë të mbarë për të zbardhur realitetin, pasuria duhet t’i kthehet Shqipërisë

Avokati Romeo Kara ka komentuar zhvillimet e fundit politike dhe protestat që janë zhvilluar përpara Kuvendit, duke i cilësuar ato si një shenjë të një “revolte të domosdoshme” për transparencë dhe ndryshim institucional. Sipas tij, vendi ndodhet në një moment kritik ku, siç shprehet, “jemi në rrugë të mbarë që të zbardhet realiteti ku fillon padrejtësia dhe ku mbaron ajo”, duke e lidhur situatën edhe me atë që ai e quan problematikë të thellë në sistemin e drejtësisë. Ai theksoi se protestat, përfshirë edhe ato përpara Kuvendit, kanë treguar një nivel të lartë qytetarie, teksa shtoi se Kuvendi duhet të ndërhyjë urgjentisht në reformimin e sistemit zgjedhor. Ndërkohë gazetari Xhevair Zhabina thotë se Prokuroria dyshon për pastrim parash për mënyrën se si janë përfituar pronat në Zvërnec. Ai deklaroi se dyshimet janë se pastrimi i parave ka ndodhur në kuadër të grupit të strukturuar kriminal. Ndërsa gazetari Mariglen Kume tha se protestuesit sot u provokuan nga një nga deputetët e PSD-së. Më tej Kume tha se sot policia kishte ardhur e përgatitur, jo si të martën.