Tràigh a' Mhachair' - Emma Macleod #gàidhlig #YCW20/21

Ged a shiubhail mi cian ’n ear ’s an iar fad bhom dhachaigh, Feadh nan eileanan siar, muir ag iadhadh gach cladach, Chan fhaca mi àit’, aon a b’ fheàrr leam air thalamh, Far am faighinn mo shlàint’ ach ri taobh Tràigh a’ Mhachair’. Chunna’ mis’ thu fo fhèath, an cuan siar ’s gun aon char ort, Agus chunna mi uair thu fo ghruaim is càir-gheal ort, ’S tric a thuit mi nam shuain ’g èisteachd nuallan do chladaich, Oir dom chluasan tha ceòl ann an crònan na mara. Bho Dùn Chroisbrig gu Cùl chan eil caochladh air carraig, Thu gun chaochladh na tràth’ on a bha mi nam bhalach, ’S tric a chunnaic mo shùil luing fo ’n siùil a’ dol seachad Air an giùlain gach là air druim-sàl Tràigh a’ Mhachair’. Nuair a thig ceann mo rèis ’s bhios mi fhèin a’ dol dhachaigh Dh’ionnsaigh ’n t-seomair bheag fhuar ach ’s am buan bhios an cadal Gheibh mi fois agus tàmh leis na càirdean nach maireann, Oir bidh leabaidh a’ bhàird dlùth do ghàir Tràigh a’ Mhachair’.