Namangan viloyati

Vernalizatsiya usuli g‘allachilikda samaradorlikni oshirmoqda Vernalizatsiya — ekish oldidan urug‘likni sovitish orqali o‘simliklarning vegetatsiya davrini qisqartirishga xizmat qiladigan agroteхnik usuldir. Ushbu texnologiya sovuq iqlim sharoitida urug‘likni saqlash orqali o‘simliklarning jadallik bilan rivojlanishiga ijobiy ta’sir ko‘rsatadi. Soha olimlari va mutaxassislari tomonidan olib borilgan dala kuzatuvlari natijalariga ko‘ra, vernalizatsiya qilingan urug‘lik bug‘doy 2–3 kun ertaroq unib chiqib, unuvchanlik va o‘sish quvvati yuqori bo‘lgani aniqlandi. Shuningdek, oddiy usulga nisbatan har bir o‘simlikda 2–3 tadan qo‘shimcha tuplanish kuzatilib, gektariga 0,5–1,0 mln donagacha ko‘proq ko‘chat olinishi tahlil qilindi. Bundan tashqari, vernalizatsiyalangan maydonlarda genetik jihatdan bir xil navlar an’anaviy usulda ekilgan maydonlarga nisbatan 6–8 kun ertaroq naychalash fazasiga kirib, 10 kun oldin pishishi hamda hosildorlik 5–7 sentnerga yuqori bo‘lishi kutilmoqda. Xususan, Namangan viloyati To‘raqo‘rg‘on tumani hududidagi "Baxtiyor Ne’matjon Shavkatjon" fermer xo‘jaligida 2026-yil hosili uchun vernalizatsiyalangan “Asr” navi ekilib parvarish qilinmoqda. Bugungi kunda ushbu maydondagi g‘alla an’anaviy usulda ekilgan maydonlarga nisbatan kuchliroq tuplanib, faol rivojlanayotgani kuzatilmoqda.