LDU-da “Müasir elmin aktual problemləri” adlı elmi konfrans

Lənkəran Dövlət Universitetində ümummilli lider Heydər Əliyevin anadan olmasının 93-cü ildönümünə həsr olunmuş “Müasir elmin aktual problemləri” mövzusunda Respublika Elmi Konfransı keçirilib. Konfrans iştirakçıları əvvəlcə ulu öndərin universitetin foyesindəki büstünü ziyarət edərək önünə gül dəstələri qoyublar. Daha sonra təhsil müəssisəsinin akt zalında konfrans öz işinə başlayıb. Mərasimi giriş sözü ilə LDU-nun rektor vəzifəsini icra edən Nizami Yusubov açaraq tədbirin məqsəd və vəzifələrindən danışdı, ölkədə elm və təhsil sahəsində həyata keçirilən islahatlardan və bu istiqamətdə universitetdə görülən işlər barədə məlumat verdi. Ardınca plenar iclasda təhsil müəssisəsinin tarix və fəlsəfə kafedrasının müdir əvəzi Rakif İbadov “Heydər Əliyevin elm və təhsil strategiyası” mövzusunda məruzə ilə çıxış etdi. Respublikamızın iqtisadi, sosial və elmi-mədəni sahələrində qazanılan uğurlardan danışan məruzəçi qazanılan bütün bu nailiyyətlərin milli lider Heydər Əliyevin adı ilə bağlı olduğunu diqqətə çatdırdı. Tədbirin sonunda ulu öndərin həyat və fəaliyyətini əks etdirən videofilmin nümayişi oldu.