Türkmenistanyň Prezidenti köpçülikleýin welosipedli ýörişe gatnaşdy

Türkmenistanda Bütindünýä welosiped güni giňden bellenildi. Bu halkara baýram mynasybetli Aşgabatda geçirilen köpçülikleýin welosipedli ýörişe Türkmenistanyň Prezidenti Serdar Berdimuhamedow hem gatnaşdy. Prezident Serdar Berdimuhamedow welosipedli ýörişiň badalga alýan ýerinde uly ruhubelentlikde garşylanyldy. Sungat ussatlary aýdym-sazly kompozisiýalar bilen çykyş etdiler. Soňra döwlet Baştutany köpçülikleýin welosipedli ýörişe badalga berdi. Häzirki wagtda welosportuň dünýädäki muşdaklarynyň sany barha artýar. Ýurtlary we halklary jebisleşdirýän baýram bolan Bütindünýä welosiped güni hem sportuň bu görnüşiniň giňden wagyz edilmegine, jemgyýetde ekologik medeniýetiň ilerledilmegine ýardam berýär. Şunda Türkmenistanyň toplumlaýyn, ylmy taýdan esaslandyrylan tebigaty goramak strategiýasyny amala aşyryp, ählumumy meseleleri çözmekde dünýä jemgyýetçiliginiň tagallalarynyň birleşdirilmegi ugrunda çykyş edýändigini, bu ugurda anyk çäreleri durmuşa geçirýändigini bellemek gerek. Welesipedli ýörişiň tamamlanýan ýerinde oňa gatnaşyjylar Türkmenistanyň başlangyjy bilen BMG-niň Baş Assambleýasy tarapyndan her ýylyň 3-nji iýunyny «Bütindünýä welosiped güni» diýip yglan etmek hakynda kabul edilen Kararnamanyň ähmiýetini bellediler hem-de pursatdan peýdalanyp, Türkmenistanyň Prezidentini, türkmen halkynyň Milli Liderini şanly sene bilen tüýs ýürekden gutladylar. Türkmenistanyň Prezidenti hemmeleri bu sport baýramçylygy bilen gutlap, Bütindünýä welosiped gününe bagyşlanyp geçirilen köpçülikleýin sport çäresine gatnaşyjylara berk jan saglygyny, üstünlikleri arzuw etdi.