WRRB YAFUNGUA RASMI MAFUNZO KWA WATENDAJI WA GHALA KUELEKEA MSIMU WA UFUTA.

Leo, Machi 24, 2026, Bodi ya Usimamizi wa Stakabadhi za Ghala (WRRB) imefungua Mafunzo Rasmi ya Zao la Ufuta Kwa Waendesha ghala mkoani Morogoro, ikiwa ni sehemu ya jitihada za kuimarisha sekta ya kilimo na Biashara ili kuwaongezea wakulima pamoja na wadau mbalimbali uelewa mpana kuhusu uzalishaji bora, uhifadhi salama na uuzaji wa mazao kupitia mfumo wa stakabadhi za ghala. Akifungua mafunzo hayo Kaimu Mkurugenzi wa Uratibu wa Huduma, CPA Thomas Mwita, amesisitiza umuhimu wa washiriki kutumia kikamilifu fursa ya mafunzo hayo kwa kuzingatia miongozo na taratibu zilizowekwa katika mfumo wa stakabadhi za ghala. Amesema kuwa kufuata taratibu hizo kutawawezesha wakulima kuongeza tija, kuboresha ubora wa mazao yao na hatimaye kupata bei yenye ushindani katika masoko ya ndani na nje ya nchi. Aidha, ameeleza kuwa mafunzo hayo ni sehemu ya mkakati wa Bodi wa kuhakikisha wakulima na wadau mbalimbali wanakuwa na uelewa sahihi wa mnyororo mzima wa thamani wa zao la ufuta, kuanzia hatua ya uzalishaji hadi masoko. Ameongeza kuwa kupitia mafunzo hayo, washiriki watapata elimu kuhusu mbinu bora za kilimo na Biashara namna ya kuhifadhi mazao kwa kuzingatia viwango vinavyotakiwa, pamoja na fursa za kifedha zinazotolewa kupitia mfumo wa stakabadhi za ghala