3-4 Foot Baraf Mein Meran Jani Track | Unexpected Mulaqat & Snow Adventure

Hum ne apna safar Mansehra se local tota gari par shuru kiya aur khoobsurat pahaari maqam Nathia Gali tak pohanchay. Wahan se hum ne paidal safar ka aghaz kiya jo humein baraf se dhaky huay mashhoor Miranjani track ki taraf le gaya. Pooray ilaqay mein taqreeban 3 se 4 foot tak baraf mojood thi aur rasta intehai mushkil tha. Jahan se asli Miranjani track shuru hota hai, uske aagay kisi ne abhi tak rasta nahi banaya tha. Isi liye humein gehri baraf mein khud rasta banana para. Main poore track mein lead karta raha aur har qadam baraf ko cheer kar aagay barhna aik alag hi adventure tha. Bina gaiters ke safar karne ki wajah se hamare shoes poori tarah geelay ho gaye aur sardi ne kaafi tang bhi kiya. Is safar ki sab se khaas baat ye rahi ke humein achanak mashhoor tour operator Muazam Bhee aur trackers Zubair aur Usaman mil gaye. Pehli dafa social media se bahar unse mulaqat hui aur phir safar bhi saath ho gaya. Raste bhar gupshup, hasi mazak aur snow adventure ne is journey ko aur yaadgaar bana diya. Raste mein humein kisi jungli janwar ke footprints bhi nazar aaye jo shayad leopard ke ho sakte thay. Adhay raste tak Muazam Bhai aur unke dost wapas laut gaye, jabke main aur mera dost mazeed aagay barhtay rahay. Lekin mausam kharab hone ke chances, akelay hone aur usi din wapas Mansehra pohanchne ki wajah se hum ne bhi wapas aane ka faisla kiya. Dil thora udaas zaroor hua kyun ke khwahish thi ke summit tak zaroor pohanchain, lekin safety aur hikmat isi mein thi ke wapas aa jaya jaye. Wapsi par aik funkaar ki khoobsurat bansri ki dhun suni, dance kiya, chai banayi aur us sard mausam mein us lamhe ko khoob enjoy kiya. Ye safar sirf trekking nahi tha, balke dosti, adventure, struggle aur yaadgaar lamhon ka aik khoobsurat experience tha.