የማያልቅ ምህረት | Yemayalk Mehiret — Hawassa University Agri Campus Fellowship New Choir Song 2026/2018

“አቤቱ፥ አንተ መሓሪና ይቅር ባይ ነህና፥ ምሕረትህም ለሚጠሩህ ሁሉ ብዙ ነውና።” — መዝሙር 86፥5 የእግዚአብሔር ምህረት እጅጉን ብዙ፣ ማለቂያ እና ማብቂያ የሌለው የእግዚአብሔር ማንነቱ ነው፤ ከእኛም ማንነት አንፃር የማይለወጥ እና ፅኑ ነው። በዚህም መዝሙር ውስጥ የእግዚአብሔርን ምህረት ማሳያ የሆኑ 3 ባለታሪኮች እንደ ተምሳሌት ሆነው ተካተዋል። 1. የጠፋው ልጅ (ሉቃስ 15፥ 11) በእስራኤል (አይሁድ) ልማድ እና ወግ አባት ሳይሞት ወይም ለሞት ሳይቃረብ በፊት ልጅ ንብረቱን አይካፈልም፤ ነገር ግን በዚህ ክፍል ላይ ልጁ አባቱ በህይወት እያለ ድርሻውን ሲጠይቅ እንመለከታለን፤ ይህንንም ድርጊት አባቱ ሳይሞት በህይወት እያለ በመፈፀሙ ምክንያት አባቱን በቁሙ እንደገደለው ተደርጎ የሚቆጠር ድፍረት ነው። ‛‛ገድሎት ሄዷል አሉ በህይወት እያለ’’ የሚለውም የመዝሙሩ ስንኝ ሀሳቡ የመጣው ከዚሁ የመፅሐፍ ቅዱስ ክፍል በመነሳት ነው። 2. ጎሜር እና ሆሴዕ (ሆሴዕ 1—2) በእስራኤላውያን ዘንድ ለትዳር ትሆን ዘንድ የምትፈለግ ሴት በእጅጉን ስረዓት ያላት እና ንፁህ ሴት ናት። ጋለሞታን ሴት እንኳን ለትዳር ለመንካት እንዳታረክሳቸው ይጠየፏታል። እግዚአብሔር ግን ለህዝቡ ያለውን ፍቅር ያሳይ ዘንድ ሆሴዕን ጋለሞታይቱን ጎሜርን እንዲያገባት እንዲወዳትም አዘዘው። ይህ በራሱ እጅግ ድንቅ ነው የጋለሞታይቱ ሴት ለትዳር መፈለግ፤ እርሷ ግን የተደረገላትን አልተረዳችምና የተሰጣትን ትልቅ ክብር ረግጣ ሌላን ተመኘች። ለዚህ ታላቅ ጥፋት ግን ተመጣጣኝ ቅጣት ሳይሆን ከመጠን ያለፈውን ምህረት ተቸረች።ስለተገባት ሳይሆን ስለሚወዳት፤ ይህ እግዚአብሔር ለእኛ ያለውን ታላቅ ፍቅር እና የማያልቅ ምህረት ያስረዳል። 3. የጴጥሮስ ታሪክ ጴጥሮስ መጀመሪያውኑም ለመመረጡ ምክንያቱ የሚመጥን እና የተገባ ማንነት ስለነበረው እና የተከበረ ስራ ስለነበረው አልነበረም፤ ይልቁንስ የእግዚአብሔር ምህረት እና ቸርነት በዝቶለት እንጂ። ጴጥሮስ ግን ኢየሱስን ከእጁ በልቶ ዶሮ ሳይጮህ በገረድ ፊት ሶስቴ ካደው። ኢየሱስም በምላሹ ጴጥሮስን እንዲያጥላላው ቢጠበቅ መጀመሪያውኑም በምህረቱ ብዛት እንጂ በራሱ አቅም ስላተመረጠ፤ በማያልቀው ምህረቱ ዳግመኛ እድልን ሰጠው፤ ሰው አጥማጅ አደረገው። ሲፈውስ ያለ ጠባሳ፣ ሲያፈቅር ከራሱ ተነስቶ፣ በማያልቀው ምህረቱ የሚቀበል ዳግመኛም የሚያቆም የእግዚአብሔር የማያልቅ ምህረት።