ಶ್ರೀ ವಿಜಯೀಂದ್ರತೀರ್ಥ ಕೃತ "ಪಾಪ ವಿಮೋಚನಾ ಸ್ತೋತ್ರ" ಕುರಿತು ಪ್ರವಚನ - ಶ್ರೀ ಬೆಮ್ಮತ್ತಿ ವಿಜಯೀಂದ್ರಾಚಾರ್ಯರಿಂದ

ಶ್ರೀ ವಿಜಯೀಂದ್ರತೀರ್ಥ ಕೃತ ಪಾಪ ವಿಮೋಚನಾ ಸ್ತೋತ್ರ (ದುರಿತಾಪಹರ ಸ್ತೋತ್ರ) ಸುಕೃತಂ ತಿಲಮಾತ್ರತುಲ್ಯಮೀಶ ಕ್ರಿಯತೇ ನೈವ ಮಯೈಕವತ್ಸರೇsಪಿ | ಅಪಿ ತು ಕ್ರಿಯತೇ ತು ದೋಷಪೂಗಃ ಪ್ರತಿಯಾಮಂ ಸಕಲೇಂದ್ರಿಯೈರ್ಮುಕುಂದ || 1 || ನ ಶಿರಶ್ಚಲತೀಶ ಮೇ ಕದಾsಪಿ ಶ್ರುತಿಜಾನಂದಭರೇಣ ಸದ್ಗುಣಾನಾಮ್ | ಅಪಿ ತು ಪ್ರಭುಬಂಧುದುರ್ಗುಣಾನಾಂ ಶ್ರವಣಾರ್ಥಂ ಚಲಿತಂ ಭವತ್ಯಶಂಕಮ್ || 2 || ಶ್ರವಣೇ ಶ್ರವಣಾಯ ಸತ್ಕಥಾಯಾ ನ ಯತೇತೇ ತವ ಪುಣ್ಯಕೀರ್ತನಸ್ಯ | ಅಪಿ ತು ವ್ಯಭಿಚಾರಲೋಕವಾರ್ತಾಶ್ರವಣಾಯೈವ ಮಹಾದರಂ ಪ್ರಯಾತಃ || 3 || ನ ಮಮಾಕ್ಷಿಯುಗಂ ಪ್ರವರ್ತತೇ ಶ್ರೀಭಗವಚ್ಚಾಸ್ತ್ರಕುಲಾವಲೋಕನಾಯ | ಅಪಿ ತು ಧ್ರುವಪಾಲ ನರ್ತಕೀನಾಂ ಗಣಿಕಾನಾಂ ಪರಿನರ್ತನಾದಿದೃಷ್ಟ್ಯೈ || 4 || ನ ಹಿ ನಾಸಿಕಯಾ ಕದಾಪಿ ವಿಷ್ಣೋ: ಪದಪದ್ಮಾರ್ಪಿತಪುಷ್ಪಗಂಧಬುದ್ಧಿ: | ಕಮಲೇಶ ಭವಾಮಿ ಕಿಂತು ವಿಷ್ಣೋಶ್ಚರಣಾನರ್ಪಿತಪುಷ್ಪಗಂಧಬುದ್ಧಿ: || 5 || ನೃಹರೇsಚ್ಯುತ ಮಾಧವೇಶ ದಾಮೋದರ ಕೃಷ್ಣೇತಿ ಮುಖಾಂಸ್ತವಾಭಿಧೌಘಾನ್ | ನ ಹಿ ಕೀರ್ತಯತೀಹ ಮೇ ಕುಜಿಹ್ವಾsಪಿ ತು ದುರ್ಲಿಂಗಭಗಾಂಕಿತಾನ್ ಕುಶಬ್ದಾನ್ || 6 || ತವ ಗೇಹವರಾವಲೇಪನಾದಿಂ ನ ಕರೌ ಮೇ ಕುರುತಃ ಕದಾsಪಿ ಭಕ್ತ್ಯಾ | ಅಪಿ ತೂರುಗುಣಾರ್ಣದುಷ್ಟವಸ್ತುಗ್ರಹಣಾಯೈವ ಮುಕುಂದಾ ಕಿಂ ತು ಕುರ್ಮ: || 7 || ಉದರಂ ಮಮ ಧಿಕ್ ಶಠಸ್ಯ ವಿಷ್ಣ್ವರ್ಪಿತಪೂತಾನ್ನವಿವರ್ಜಿತಂ ನಿತಾಂತಮ್ | ಯದಪೂತತರಾಸಮರ್ಪಣೀಯಾಧಮವೃಂತಾಕಪಲಾಂಡುಪೂರ್ವಭಾಜ: || 8 || ಖಲಜಾರವಧೂಗೃಹಾಣಿ ನಿತ್ಯಂ ಚರಣಾಭ್ಯಾಮನುಯಾಮ್ಯಹಂ ಖರಾಭ್ಯಾಮ್ | ನ ತು ಮಾಧವ ತಾವಕಾಲಯಾಂಶ್ಚ ಪ್ರತಿಯಾಮೀಶ ಮಹತ್ತಮಾಗ್ರಹೋsಹಮ್ || 9 || ಮನ ಏವ ಹರೇsಖಿಲೇಂದ್ರಿಯಾಣಾಂ ವರಮಿತ್ಥಂ ಪ್ರಮಿತಂ ಶ್ರುತಿಸ್ಮೃತಿಭ್ಯಾಮ್ | ಸುಮನೋಜಯಿನೋsಖಿಲೇಂದ್ರಿಯಾಣಾಂ ಜಯ ಏವೇತಿ ಜನಾನುಭೂತಿರಸ್ತಿ || 10 || ಮನಸಾsಚ್ಯುತ ಕೃಷ್ಣ ತಾದೃಶೇನಾಪ್ಯನುಚಿಂತ್ಯೈವ ಭವಂತಮಾತ್ಮಭಕ್ತಾನ್ | ಭವವಾರಿನಿಧೇ ಸುತಾರಯಂತಂ ಭವವಾರ್ಧಿಂ ನ ಹಿ ತರ್ತುಮಸ್ತಿ ಯತ್ನಃ || 11 || ಮಮ ಪಾಪಚಯಸ್ಯ ವಾಸುದೇವಾಂತಕ ಲೋಕಸ್ಥಿತಿರೇವ ಚೇತ್ ಫಲಂ ತು | ನ ಸುಖೀಸದೃಶೋsಸ್ತಿ ಮೇ ತ್ರಿಲೋಕ್ಯಾಂ ಫಲಭಾವೇನ ಮಹತ್ತಮೋsಸ್ತಿ ಕ್ಲೃಪ್ತಮ್ || 12 || ನ ಸುಖಾನುಭವಾಯ ಪಾಪಕರ್ಮಾಣ್ಯಹಮೀಶಾನುದಿನಂ ತನೋಮಿ ಕಿಂತು | ಅಘನಾಶಿಯಶ: ಪರೀಕ್ಷಾಣಾರ್ಥಂ ತವ ನಾಮ್ನಾಮನುತಾಪಸಿದ್ಧಯೇ ವಾ || 13 || ನ ಸುಖಂ ವಿಷಯಾದ್ಧಿ ಕಿಂತು ಪ್ರಸುಖವ್ಯಾಪ್ತಿ ಬಲಾತ್ ಪರೀಕ್ಷಯಾsಪಿ | ತವ ಮಂಗಲನಾಮಕೀರ್ತನೋತ್ಥೈ: ಸುಕೃತೈ: ಶಮಂಮಮೇತಿ ಕೋsಪರಾಧ: || 14 || ನಿಜವಾಸರುಷಾ ಪ್ರದಾತುಮಾರ್ತಿಂ ಹ್ಯಧಿಕಾಂ ಪಾಪನಿಯಾಮಕಾಸುರೇಭ್ಯಃ | ಅಶುಭಾನ್ಯಪಿ ಕಾರಯನ್ ಮಯಾ ತ್ವಂ ರಮಸೇ ಸರ್ವನಿಯಾಮಕೇತಿ ಭಾತಿ || 15 || ಯದಿ ಕೃಷ್ಣ ಕದಾಚನಾಪಿ ಪುಣ್ಯಂ ಘಟತೇ ಪಾಪಮಯಸ್ಯ ಮೇsಪಿ ತತ್ತು | ಪ್ರಬಲಾಘಚಯೈರ್ವಿಹನ್ಯತೇ ವಾ ದುರಿತಧ್ವಂಸಕೃತಾರ್ಥಮೀಶ ವಾ ಸ್ಯಾತ್ || 16 || ತದಿಹೋಭಯಥ ವಿಪುಣ್ಯಮೂರ್ತೇ: ಸುಕೃತಂ ನೋ ಘಟತೇ ಮನಾಗಪೀಶ | ವದಮೇ ಪುರತಸ್ತ್ವತೀವ ಭೀರೋರ್ಭಗವನ್ ಕಾಲಭಯಾಪಹರ್ತ್ಯುಪಾಯಮ್ || 17 || ಅತುಲಂ ವರವೈಷ್ಣವಂ ಸುಜನ್ಮಾಚ್ಯುತ ದತ್ತಂ ಕೃಪಯಾ ತ್ವಯಾsಹಮಾಪ್ಯ | ಕ್ಷಣಜೀವ್ಯಪಿ ಕಲ್ಪಗತ್ವಬುದ್ಧ್ಯಾ ಪಶುಚಂಡಾಲವದೇವ ಸಂಚರಾಮಿ || 18 || ನ ತದಸ್ತಿ ಶರೀರಿಣಾಂ ಶತಾಬ್ದಾಯುಷಿ ಶಾಸ್ತ್ರಪ್ರಮಿತೇsಪಿ ಕಿಂಚಿದೇವ | ಭಗವನ್ ಖಲು ಸುಪ್ತರಾತ್ರಿಕಾಲೊ ಜಲಹೋಮಸ್ಯ ಸಮಾನತಾಮುಪೈತಿ || 19 || ದ್ವಿದಶಾಬ್ದಯುಗಂ ದಿವಾsಪಿ ಪೂರ್ವೋತ್ತರಮೀಶ ಸ್ಥವಿರತ್ವಶೈಶವಾಭ್ಯಾಮ್ | ಸಮಯಂ ಪ್ರಣಯಾಮಿ ಸರ್ವರೋಗೈ ರ್ಬಹುಲೀಲಾಭಿರಪಿ ಪ್ರಮೂಢಬುದ್ಧ್ಯಾ || 20 || ಪರಿಶೇಷಿತ ಈಶ ಮಧ್ಯಕಾಲಃ ಸುಕೃತೇ ಭಾರತಭೂತಳೇsವಸಿಷ್ಠ: | ಯದಿಹಾಸ ಸದೈವ ಪಾಪಚಿತ್ತೇ ಮಯಿ ಪಶ್ವಂತ್ಯಜಯೋಶ್ಚ ಕೋsಪರಾಧ: || 21 || ಇಹ ಭಾರತಭೂತಳೇsತಿಪುಣ್ಯೇ ದ್ರವಿಣಸ್ತ್ರೀಸುತಪೂರ್ವಕೇಷು ಮಾಯಾಮ್ | ಅಲಮೇಕದಿನಂ ವಿಮುಚ್ಯ ವಾ ಮೇ ತವ ಪಾದಾಬ್ಜರತಿಂ ಪ್ರದೇಹಿ ದೇಹಿ || 22 || ರಮಯಾsಪ್ಯಗಣೇಯವಸ್ತುಜಾತಂ ದ್ವಿವಿಧಂ ಪ್ರಾಹುರಮಂದಬುದ್ಧಿಭಾಜ: | ತವ ಸದ್ಗುಣಜಾತಮೇಕಮನ್ಯನ್ಮಮ ದುರ್ವಾರದುರಂತಪಾಪಜಾತಮ್ || 23 || ಅತಿಸೌಖ್ಯಕರಾಣ್ಯಲಂ ಪರತ್ರೇಹ ತು ಕಿಂಚಿತ್ ಶ್ರಮಸಾಧ್ಯಸಾಧನಾನಿ | ಶ್ರಮಭೀರುರಹಂ ತ್ಯಜನ್ ಪರತ್ರಾಮಿತ ಸೌಖ್ಯಾನುಭವೀ ಕಥಂ ಭವೇಯಮ್ || 24 || ಭುವಿ ಯದ್ಯಪಿ ಪಾಪಿನೋ ವಸಂತಿ ಶ್ರಮಭಾಜ: ಪುರುಷಾಸ್ತಥಾsಪಿ ಕೋsಪಿ | ಮಮ ಪಾಪಸಮಾನಪಾಪಕರ್ತಾ ಪುರುಷೋ ನಾಸ್ತಿ ಹಿ ನಾಸ್ತಿ ನಾಸ್ತಿ ನಾಸ್ತಿ || 25 || ನತಯೋ ನ ಕೃತಾಃ ಪ್ರದಕ್ಷಿಣಾಶ್ಚಸ್ತುತಯೋsಪಿ ದ್ರುತಕಮಿತಾರ್ಥದಾತ್ರ್ಯ: | ನ ಗುರು: ಪರಿಸೇವಿತ: ಸುಭಕ್ತ್ಯಾ ಶುಭಶಾಸ್ತ್ರಶ್ರವಣಂ ಕಥಂ ತತಃ ಸ್ಯಾತ್ || 26 || ವಚನೈರ್ಬಹುಭಿರ್ಮುಕುಂದ ಕಿಂ ತೇ ಶ್ರುಣು ಮೇ ಬೀಜವಚೇ ವದಾಮಿ ತುಭ್ಯಮ್ | ಭುವನತ್ರಯಸಂಸ್ಥಿತಾನಿ ಯಾನೀಶ್ವರ ಪಾಪಾನಿ ವಸಂತಿ ಮಯ್ಯಯೋಗ್ಯೇ || 27 || ಪ್ರಕೃತೈಸ್ತದಘೈಶ್ಚಕೃಷ್ಣ ಮುಕ್ತಿರ್ನ ಭವೇತ್ ಕೈರಪಿ ತೇ ದಯಾಂ ವಿನಾsದ್ಯ | ಕರುಣಾಂ ಕುರು ಮಯ್ಯತೋ ಮುರಾರೇ ನತಯಸ್ತೇ ಕಮಲೇಶ ಸಂತ್ವನಂತಾಃ || 28 || ವಿಜಯೀಂದ್ರಯತೀಶ್ವರೋ ವ್ಯತಾನೀತ್ ಸ್ತುತಿಮೇನಾಂದುರಿತಾಪಹಾಂ ಮುರಾರೇ: | ಪರಮಾದರತಃ ಸದಾ ಪಠೇದ್ಯೋ ನಿಖಿಲೈಃ ಪಾಪಚಯೈರ್ಭವೇ ಸ ಮುಕ್ತಃ || 29 || ||ಇತಿ ಶ್ರೀಮದ್ವಿಜಯೀಂದ್ರಯತಿಕೃತ ಪಾಪಮೋಚನ (ದುರಿತಾಪಹರ) ಸ್ತೋತ್ರಮ್|| ಶ್ರೀ ಕೃಷ್ಣಾರ್ಪಣಮಸ್ತು