หนังสือปีใหม่เมืองล้านนา พ.ศ.2568

หนังสือปีใหม่เมืองล้านนา ปีมะเส็ง พ.ศ. ๒๕๖๘ จ.ศ.๑๓๘๗ ปีดับใส้ กัมมัชพล ๕๑๘ มาสเกณฑ์ ๑๗๑๕๕ อุจจพล ๑๘๐๒ หรคุณ ๕๐๖๖๑๕ ดิถี ๑๙ อวมาน ๔๗ วาร ๔ หนังสือปีใหม่เมืองล้านนา ประจำปีพุทธศักราช ๒๕๖๘ จุลศักราช ๑๓๘๗ ตัว ปีดับใส้ ไทยว่าปีมะเส็ง สัปตศก ปีนี้สังขานต์ล่องเดือน ๗ เหนือ แรม ๒ ค่ำ พร่ำว่าได้วันจันทร์ที่ ๑๔ เมษายน วันไท เป็นวันก่าเป้า วันพญาวันหากได้วันพุธที่ ๑๖ เมษายน วันไท เป็นวันดับเหม้า ในวันสังขานต์ล่องนั้น หื้อไปสู่สระน้ำใหญ่ หนทางไฅว่สี่เส้น หรือต้นไม้ใหญ่ กระทำการสระเกล้าดำหัวหื้อเป็นสิริมังคละ ด้วยน้ำขมิ้นส้มป่อย สระเกล้าดำหัว หื้อเบ่นหน้าไปหนวันตก แล้วหื้อนุ่งผ้าใหม่ เหน็บดอกซ้อน(พุด)อันเป็นพญาดอกประจำปี จักวุฑฒิจำเริญแล สังขานต์ไปวันจันทร์ ขุนสังขานต์ทรงด้วยเครื่องอันมีสีขาว สุบกระโจม ต่างกระจอนหู มีแก้ววิฑูรย์เป็นเครื่องประดับ เหน็บดอกอุบลขาว มือทั้งสองถือดอกอุบลขาว นอนสะแกงมาบนหลังช้างเผือก เสด็จลีลาศอว่ายหน้าไปหนปัจฉิมทิศ นางเทวดาชื่อมโนรา ถือดอกซ้อน(พุด)อันเป็นดอกไม้นามปี มานอนถ้ารับเอาขุนสังขานต์ไป ปีนี้นาคหื้อน้ำ ๗ ตัว ฝนตก ๓๐๐ ห่า ตกที่เขาสัตตบริภัณฑ์ และตกในมหาสมุทร ๑๔๖ ห่า ตกในป่าหิมพานต์ ๙๘ ห่า และตกในโลกมนุษย์ ๕๖ ห่า ปีนี้ ช้างรักษาปี กวางรักษาเดือน ลารักษาป่า งูรักษาน้ำ อากาสเตโชเทวบุตรรักษาอากาศ ทกรักขยักษ์รักษาดิน พระเจ้าเป็นใหญ่แก่ฅนทั้งหลาย นกเขียน(นกกระเรียน)เป็นใหญ่กว่าสัตว์สองตีน ช้างเป็นใหญ่แก่สัตว์สี่ตีน ไม้หาดเป็นใหญ่แก่ไม้จริง ไม้ละโมง(ไผ่รวกหางช้าง)เป็นใหญ่กว่าไม้กลวง หญ้าเหนี้ยวหมูเป็นใหญ่แก่หญ้าทั้งหลาย ผีเสื้อ(อารักษ์)อยู่ต้นอ้อ อย่าได้สับ ฟัน บั่น ตัดต้นอ้อ จักเป็นอุบาทว์ ขวัญข้าวอยู่ไม้เดื่อ ไม้ถิม(ถั่วเขียว)เป็นพญาไม้ หื้อเอาใบไม้ถิมมามัดผูกติดเสาเรือน เสาเอก เสานาง เสาร้านค้า จักวุฑฒิจำเริญดี แลปีนี้รสดินบ่มีหลาย ฝนหัวปีดี หล้าปีบ่มี พิชชะของปลูกอุดมดี ของเขียวแพง ของลายถูก ฅนเกิดวันเสาร์มีเคราะห์หื้อรีบสะเดาะเคราะห์เสีย ฅนเกิดวันพุธมีโชคลาภ ท้าวพระยาจักเดือดร้อน อุบาทว์จักมีแก่ผู้เป็นใหญ่แล สาสนาพระเจ้าล่วงแล้วได้ ๒๕๖๗ พระวัสสา อนาคตะยังอยู่แถม ๒๔๓๓ พระวัสสา จิ่งบัวระมวล ปริโยสานะสมัตตาฯ สนั่น ธรรมธิ/พยากรณ์